OUDTSHOORN NUUS - Die 25ste Highgate interprovinsiale twee-kampbyeenkoms word weer op 6 Februarie op Oudtshoorn aangebied. Benewens die SWD sal atlete van die Westelike Provinsie, Boland, Grens, Oostelike Provinsie, Vrystaat en Grie-kwas deelneem.
Meer as 465 atlete het verlede jaar aan hierdie gewilde byeenkoms deelgeneem en ook twee SA rekords verbeter. Die WP het die spankompetisie gewen met 123 219 punte, gevolg deur Boland (114 441) en die SWD (86 137).
Oudtshoorn word as een van die beste dorpe vir die aanbied van tweekampbyeenkomste in SA beskou danksy sy puik fasiliteite, puik ondersteuning van die plaaslike munisipaliteit, die weer, verskeie toerisme aantreklikhede en bekostigbare akkommodasie.
Die DCAS/groter Oudtshoorn-munisipaliteit/Highgate interprovinsiale tweekampbyeenkoms was voorheen as die Kangogrotte-tweekampbyeenkoms bekend.
Die opening op Saterdag 6 Februarie is om 07:30 en die eerste hardloopitems begin om 08:00 by die De Jager-sportkompleks. Die swem volg direk daarna by die NA Smit-swembad. Toegang is gratis.
Die SWD is vanjaar gasheer saam met die Boland.
Die Highgate-volstruisvertoonplaas, ankerborg van SWD-tweekamp, bied weer spesiale aan-sporingspryse vir alle wenners aan. Die ander groot borge is die Wes-Kaapse departement van kultuursake en sport (DCAS), Hisense en die groter Oudtshoorn-munisipaliteit.
Met sewe provinsies wat deelneem is dié byeenkoms die tweede grootste in die land naas die SA-kampioenskappe. Die spankompetisie gaan vanjaar weer groot uitdagings aan die WP, Boland en OP stel. Elke provinsie mag ook 'n ontwikkelings- of 'n B-span inskryf. Dit is een van die min byeenkomste waar 'n ontwikkelings-atleet ook tot sy reg kan kom.
Van die SWD se topatlete, soos Johan Windt, Chris van Wyk, Trisha Policutte, Kirsten Barbour, Bianca la Grange, Luca Potgieter, Eugene van der Merwe, Marius Hugo en Gustav Schlechter, gaan beslis onder die medaljes jag.
Daar word weer vanjaar ook vir gestremde atlete voorsiening gemaak. Hulle baanitems bestaan uit 400 m en swem oor 50 m. Enige gestremde sportpersoon wat belangstel om deel te neem, kan gerus die organiseerder by 082 773 4901 kontak.
Alle SWD-atlete word herinner aan die tradisionele SWD-dubbelsbyeenkoms wat op 19 Januarie om 18:00 op Oudtshoorn plaasvind. Enige atleet is welkom om deel te neem. Wat dié dubbelsbyeenkoms anders maak, is dat een atleet hardloop en sy spanmaat swem.
Vir enige navrae kontak Dave van der Walt 082 773 4901.
'Ons bring jou die nuutste Oudtshoorn, Klein-Karoo nuus'
