OUDTSHOORN NUUS - "Dit gaan beter met Carol Ann. Sy was die week vir 'n veloorplanting aan haar regterbeen en -voet en is nie meer in die hoësorgeenheid nie."
So sê Carol Ann van Rensburg (19) se ma, Ansie, nadat Carol Ann verlede week in 'n ernstige botsing met haar motorfiets in Rademeyerstraat betrokke was.
Die Oudtshoorn Courant het verlede week oor die botsing by die kruising van Rademeyerstraat en Oostelikeweg berig. Carol Ann het regs in Oostelikeweg gedraai en 'n vragmotor, wat van voor gekom het, het haar getref. Daar was 'n stopteken aan die vragmotor se kant terwyl die Carol Ann ryvoorrang gehad het.
Van Rensburg het vertel dat haar dogter se linkerknie vergruis is en dat daar 'n gat in haar regterkuit is. Sy het ook 'n rib gebreek en 'n stamp teen haar kop gekry, maar gelukkig het sy geen breinskade opgedoen nie.
Die regterkuit het 'n groot gat wat ook deur die ongeluk veroorsaak is. Carol Ann het brandwonde aan haar regtervoet opgedoen en dit is reeds met 'n veloorplanting reggemaak.
"Die veloorplanting was 'n geweldige seer operasie. Sy was onder vreeslike pyn en het begin skree toe sy wakker word. Die dokter sê egter die beserings lyk al beter. Sy sal iewers in die toekoms ook 'n knievervanging moet kry, maar dit kan eers gebeur as al die bene heeltemal terug gegroei en gesond is," vertel sy.
Volgens Van Rensburg kan Carol Ann ook nie die ongeluk onthou nie.
"Sy weet wat sy by ons en die polisie gehoor het en verder onthou sy net die bestuurder se gesig."
Van Rensburg sê die Christian Motorcycle Association (CMA) van George het die gesin verlede Sondag na 'n diens toe genooi.
"In die stadium beteken hulle regtig baie vir ons. Hulle het spesiaal by die diens vir haar gebid en besoek haar ook elke tweede dag in die hospitaal. Hulle het selfs 'n CMA Bybel aan haar gegee."
Carol Ann is 'n student aan die National Computer College.
Kapt. Louis Visser, woordvoerder van die Oudtshoorn-polisie sê daar is nog niemand in verband met die voorval in hegtenis geneem nie en die polisie ondersoek die saak.
Klik hier vir vorige artikels:
- Knie vergruis na gru-botsing
- Student vergruis knie na motorfietsongeluk
- Opvolg: Motorfiets beland onder vragmotor
- Motorfietsryer beland onder vragmotor
ARTIKEL: LIEZL VAN NIEKERK, OUDTSHOORN COURANT-JOERNALIS
'Ons bring jou die nuutste Oudtshoorn, Klein Karoo nuus'
