OUDTSHOORN NUUS - Die hof glo nie die beskuldigde nie, maar die staat het nie daarin geslaag om sy skuld bo redelike twyfel te bewys nie en daarom is hy ge-regtig op vryspraak.
So het streeklanddros Mark van Wyngaardt Vrydagoggend 14 Oktober in sy uitspraak van 32 bladsye in die bedrogsaak teen die voormalige boekhouer van Camelus Voere, Erasmus Petrus (Rassie) Kleyn, gesê. Die saak is reeds sedert 2013 aan die gang.
"Die onus rus nie op die beskuldigde om sy onskuld te bewys nie," het die landdros gesê.
"Die staatsgetuies, Chris Bredekamp, 'n geoktrooieerde rekenmeester, Michelle Pratt, 'n interne boekhouer van Camelus Voere, sowel as die eienaar, dr. Stephanus Cilliers, is almal persone wat enkelgetuienis gelewer het en al drie se getuienis moet met versigtigheid benader word.
"Al drie het moontlike motiewe wat hul getuienis kan inkleur," het die landdros gesê.
Kleyn het aanvanklik tereggestaan op 385 klagtes van bedrog/alternatiewelik diefstal wat later verminder is tot 71. 'n Klag van oortreding van die wet op beslote korporasies is ook later tot die klagstaat gevoeg.
Die staat het beweer dat hy meer as R8 miljoen van Camelus Voere na sy eie rekening oorgeplaas het sonder die toestemming van Cilliers.
Kleyn het volgens die staat nooit die eienaar van Camelus Voere met korrekte state ingelig oor die situasie in die besigheid nie.
Kleyn se regshulpprokureur, Wenzel Botha, het in sy betoog aangevoer dat die beskuldigde sy weergawe aan die hof gestel het en nie inbreek gemaak is op sy geloofwaardigheid nie.
Met verwysing na die boekhouding van Michelle Pratt het Botha gesê dat Kleyn dalk nie behoorlik elke jota en tittel en elke inskrywing nagegaan het nie.
"Hy was veronderstel om te aanvaar dat mev. Pratt sou reg werk en aan die einde van die dag het sy nie en hy het verkeerdelik aanvaar, maar dit maak nie dat hy opsetlik iemand bedrieg het nie."
"Ek vra die hof om die beskuldigde onskuldig te bevind en te ontslaan word op ieder en 'n elk van die klagtes."
Die hof het bevind dat daar nie enige voordeel vir Kleyn was nie.
"Indien daar 'n wanaanwending van ongeveer R8 miljoen was, is die vraag hoe die beskuldigde die geld kon geneem het sonder dat dit 'n spoor in die boeke van Oudtshoorn Rekenkundige & Finansiering BK kon laat? Indien dit gebeur het waar is die geld," wou die landdros weet.
Klik hier vir vorige artikels:
- Rassie Kleyn vrygespreek in bedrogsaak
- Uitspraak in 'klein' bedrogsaak uitgestel
- Uitspraak in bedrogsaak uitgestel
- Klein bedrogsaak eers in April
- Kleyn bedrogsaak uitgestel tot Maart
- Saak teen voormalige boekhouer uitgestel
- Bedrogsaak teen Kleyn weer uitgestel
- Sakeman weer in hof vir bedrog
- Sakeman se saak uitgestel tot Augustus
- Rassie Kleyn-bedrogsaak uitgestel
- Rassie Kleyn-saak weer uitgestel
- Rassie Kleyn-saak weereens uitgestel
- Kleyn verteenwoordig homself Geld was glo lening
'Ons bring jou die nuutste Oudtshoorn, Klein Karoo nuus'
