OUDTSHOORN NUUS - Die laaste ding waaraan 'n mens dink as jy of jou kind wat pas 'n rybewys gekry het, agter die stuur inklim is 'n ongeluk.
Ongelukke gebeur egter onverwags en het ernstige gevolge. Na 'n ongeluk is 'n mens geskok en dikwels nie in staat om helder te dink nie. Hier volg 'n aantal belangrike dinge wat in geval van 'n ongeluk onthou moet word.
Dit is dalk nie 'n slegte idee om hierdie lys in die motor te hou nie.
- Skakel die motor af om te verseker dat 'n vonk nie dalk 'n brand veroorsaak nie.
- Indien jy self in skok is skakel dadelik iemand wat jou kan bystaan.
- Skakel noodfligte aan of plaas rooi gevaardriehoeke uit om ander moto-riste te waarsku dat die pad versper is.
- Moenie die toneel verlaat nie.
- Probeer kalm bly, moenie stry, iemand beskuldig of enige skuld erken nie.
- Dis altyd beter om te wag totdat die polisie op die toneel is.
Indien die voertuig nog kan ry en daar nie ernstige beserings is nie, beweeg dit na die skouer van die pad weg van aankomende verkeer. Om die motors in die middel van die pad of besige interseksie te laat kan verdere ongelukke en beserings veroorsaak.
Skakel vir mediese bystand. Indien daar enige beserings is, moenie beseerdes beweeg behalwe as u mediese kennis of opleiding het om sulke pasiënte te hanteer nie.
Ruil die volgende inligting uit met die ander party: naam, adres, telefoonnommer, versekeringsmaatskappy en polisnommer. Indien die bestuurder nie die versekerde is nie, bevestig die verwantskap en skryf die naam en adres neer van alle insittendes.
Neem selfoonfoto's van die voertuie of doen 'n skriftelike beskrywing van alle motors betrokke in die ongeluk, insluitende die jaar, vervaardiger, model en kleur - asook die presiese ligging van die ongeluk en hoe dit gebeur het.
Dokumenteer die ongeluk. Dokumenteer die skade aan al die voertuie. Indien daar getuies is, probeer om hulle kontakbesonderhede te kry; hulle mag dalk behulpsaam wees indien die ander bestuurder verskil met jou weergawe van die ongeluk.
Maak seker die polisie neem 'n volledige verklaring.
Meld die ongeluk by die SAPD aan. Alhoewel die polisie nie uitkom na 'n ongeluk indien daar nie beserings is nie, moet die bestuurders 'n ongeluksverslag by 'n polisiekantoor indien. So 'n verslag bespoedig soms verseke-ringseise.
Hou 'n afskrif van u versekering in die voertuig.
Hou kontaknommers vir jou versekeringsmakelaar in jou voertuig.
Maak seker jy het die 24 uur ondersteuningsnommer vir padbystand op jou foon.
Maak seker jy weet watter polisie-stasie se lede op die toneel was. Wie die beampte was en wat sy magsnommer is. Kry ook die saaknommer indien moontlik.
'Ons bring jou die nuutste Oudtshoorn, Klein-Karoo nuus'
