PRINS ALBERT NUUS - Presies 'n maand nadat Caleb Swanepoel (20) van Prins Albert sy regterbeen in 'n byna dodelike haaiaanval by Buffelsbaai verloor het, is hy terug agter die teksboeke om sy dramakursus aan die Universiteit Kaapstad te hervat.
Caleb het Donderdag aan Oudtshoorn Courant gesê hy vertrek dié naweek na Kaapstad en begin Maandag (27 Julie) in alle erns om verlore studietyd in te haal.
Die dapper held van Prins Albert het sy been tot net bokant die knie op 27 Junie verloor toe hy en sy twee broers, Joshua (22) en Alexander (19), branders gaan ry het.
Ten aanskoue van sy gesin wat op die strand gesit het, het 'n haai van sowat drie meter eers hóm aangeval en daarna hom én Alexander, toe dié teruggeswem het om sy broer uit die doodskake te red. Alexander se linkervoet is amper afgebyt, maar hy het daarin geslaag om met sy erg beseerde broer veilig strand toe te swem.
Volgens Caleb is daar nou net een pad – en dis vorentoe. Hy erken egter die rol van sy lektore en medestudente in sy toekomsplanne: "Volgende week begin ek weer studeer – die dramadepartement is ontsettend positief en akkommoderend om my te help om my studie voort te sit."
Daar lê 'n besige pad vir hom en sy gesin voor, want in Augustus begin hy ook met rehabilitasie en die pas van 'n prostese. Daar is verskillende opsies vir so 'n prostese – wat meganies of volledig gerekenariseer kan wees, vertel Caleb. "Maar 'n realistiese koste teiken is R1,4 miljoen."
Om die besluit te neem oor die "regte" been vir 'n aktiewe, energieke en sportiewe jong man soos Caleb, help 'n arbeidsterapeut, 'n prostesis en 'n biokinetikus hom om alle moontlikhede te oorweeg en dan 'n besluit te neem.
"Die ideaal is dat 'n nuwe been my in staat sal stel om steeds aan 'n klomp aktiwiteite deel te neem - dalk aan nog meer as voorheen!" sê hy ná 'n besoek aan die Cape Amputee Clinic by die Vincent Palotti-hospitaal in Kaapstad.
Vir enige gesin lyk die koste van so 'n prostese, saam met voortgesette terapie, finansieel onbereikbaar – daarom het Prins Albert met volskaalse geldinsamelingsveldtogte begin.
'n Bankrekening is spesiaal vir dié doel is geopen en word bestuur deur 'n gesinsvriendin Zelia Mullins van Prins Albert.
Intussen het The Showroom-teater hier ook ingeklim en 'n groot veiling georganiseer vir Saterdag 1 Augustus. Volgens Fourie Munro, teaterbestuurder, "Kan jy ons nou al laat weet van enigiets wat jy wil skenk om opgeveil te word ten bate van Caleb se fonds – of dit nou 'n potjie konfyt is of jou duurste skildery.
Alles is welkom. Ons gaan dit dan op daardie dag in die teater se voorportaal uitstal en veilingsentoesiaste kan die ware vanaf 17:30 besigtig. As hulle daarin belang stel om op iets te bie, kry hulle 'n kaartjie met 'n nommer om aan die veiling te kan deelneem."
Die afslaer is Mark Steyn, wat jaarliks ook Prins Albert se 30 cm x 40 cm-kunsveiling hanteer, met Charon Landman, mede-eienaar van die teater en eienaar van die Swartberg-hotel, wat een van die dryfvere agter die veilingsinisiatief is.
Handmade Karoo Handgemaak, 'n organisasie in Prins Albert wat in 2010 begin is om werk te verskaf aan mense met handwerkvaardighede, het Caleb die afgelope week genooi om vir hom 'n kleurvolle gebreide hasie te kom uitsoek.
Tydens sy besoek het die groep aangekondig hulle gaan 100 hasies brei en R100 van die verkoopprys van R280 aan die Caleb-fonds skenk. Die vroue sê Caleb is 'n rolmodel en inspirasie vir die dorp en daarom wil hulle iets in sy lewe terugsit. "En ons wil hom op 7de Laan sien!"
Caleb sê dié steun van Prins Albert se mense is vir hom 'n reuse-motivering om nie moed te verloor nie en om my dramastudie te voltooi.
"Ná die ongeluk het ek baie getwyfel of ek met my studie kan aangaan, maar nadat ek met my lektore en ander mense by die universiteit gepraat het, weet ek ek hoef
nie tou op te gooi nie. Ek is vasbeslote om te voltooi wat ek begin het. Ek wil in die toekoms my ervaring gebruik om mense te bereik en te inspireer."
Nog planne is dat hy betrokke gaan raak by 'n opvoedkundige program van die Nasionale Seereddingsinstituut (NSRI) as openbare spreker.
Vir meer inligting rakende die Hasie-projek besoek gerus die Facebook-blad Handmade Karoo Handgemaak of stuur 'n e-pos aan info@karoohandgemaak.com.
Vir meer inligting rakende The Showroom-veiling stuur 'n epos aan admin@showroomtheatre.co.za of skakel Fourie Munro by 023 5411 563. Vir meer inligting rakende die bankrekening wat vir Caleb geskep is stuur 'n e-pos aan Fondsinsameling vir prostese vir Caleb Caleb upbeat as he heads home Caleb Swanepoel going home 'A miracle that Caleb is alive' Update: Shark attack victim recovering Shark attack victim undergoing surgery Buffel's Bay shark attack update Update: Buffel's Bay shark attack Beaches closed after shark attacks Shark attack in Buffel's Bay
Verwante artikels:
Caleb Swanepoel saam met die vroue van Handmade Karoo Handgemaak wat die Hasie-projek vir hom begin het. Foto: verskaf
ARTIKEL: LIEZL VAN NIEKERK, OUDTSHOORN COURANT - JOERNALIS.
'Ons bring jou die nuutste Oudtshoorn, Klein-Karoo nuus'
