OUDTSHOORN NUUS - Die oudonderwyser van St Konrad Primêr op Dysselsdorp, wat aan seksuele aanranding skuldig bevind is, is Donderdag 18 Februarie, ‘n opgeskorte vonnis opgelê.
Andries Jacobs (49) is daaraan skuldig bevind dat hy 'n 13-jarige, graad 6-leerder voor ander leerders betas het.
Streeklanddros Daniel Boks het die gemeenskapslede van Dysselsdorp, wat die hofsaal ter ondersteuning van Jacobs volgepak het, asook sy voormalige kollegas wat ‘n brief ter ondersteuning aan die hof gestuur het, berispe.
Volgens die streeklanddros word Jacobs, wat ‘n ernstige misdryf teenoor ‘n minderjarige gepleeg het, ondersteun terwyl die kind, ironies, vergeet word.
Volgens hom het hulle nie die getuienis van die kind gehoor nie.
Die landdros het in ag geneem dat die kind volgens 'n proefbeampte verslag, nie meer aan die voorval dink nie, goed vaar op skool en geen simptome van vrees toon nie.
Jacobs is tot vyf jaar tronkstraf gevonnis wat in geheel voorwaardelik vir vyf jaar opgeskort is asook 24 maande korrektiewe toesig ingevolge Artikel 276 (1) (h) wat behels huisarres vir 24 uur per dag vir die volle twee jaar, uitsluitend vir werk en kerkdoeleindes.
Hy moet ook 16 uur per maand gemeenskapswerk doen en onbevoeg verklaar om 'n vuurwapen te besit.
Klik hier vir vorige artikels:
Lees meer in Vrydag se Oudtshoorn Courant, asook aanlyn.
'Ons bring jou die nuutste Oudtshoorn, Klein Karoo nuus'
