OUDTSHOORN NUUS - Die lang verwagte mosies van wantroue in Oudtshoorn se burgemeester en onderburgemeester is uiteindelik vandag deur die raad ingestel.
Daar is vanmiddag met ‘n meerderheid van 14 stemme beslis dat Gordon April en Vlancio Donson onderskeidelik hulle poste as burgemeester en onderburgemeester kwyt is.
Oudtshoorn se nuwe burgemeester is rdh Wessie van der Westhuizen (DA) en die nuwe onderburgemeester is die vorige speaker rdh John Stoffels van die NPP.
Sedert Stoffels twee weke gelede bedank het en die DA se Chris Macpherson as nuwe speaker aangewys is, is daar angstig gewag dat die DA die raad sal oorneem.
Die raadsvergadering, wat verlede Donderdag uitgestel is, het vanoggend om 10:00 weer begin.
Tydens die raadsvergadering wat meer as vyf ure geduur het as gevolg van verskeie onderbrekings vir koukusvergaderings, is vier belangrike besluite geneem:
- Die delegasiemagte van die burgemeester en die burgemeesterskomitee word teruggetrek
- Die herstelplan van minister Pravin Gordhan en Anton Bredell word aanvaar en sal oor die volgende ses maande gevolg word
- Die begroting van Oudtshoorn met ‘n paar veranderinge is goedgekeur
- ‘n Nuwe burgemeester onderburgemeester is aangewys.
Teen gister was daar nog sterk sprake dat die mosies nie sou dien nie en daar was selfs sprake dat die dorp onder administrasie geplaas sou word.
Die DA se leier in die Wes-Kaap en ook burgemeester van Kaapstad, Patricia de Lille het vandag se vergadering in die openbare galery bygewoon en is tans besig met ‘n mediakonferensie.
ARTIKEL: HANNES VISSER, OUDTSHOORN COURANT-REDAKTEUR
'Ons bring jou die nuutste Oudtshoorn, Klein-Karoo nuus'
