SUID-KAAP NUUS - Die publiek, insluitend boere en sakelui tussen Mosselbaai en George, en George en Beaufort-Wes word versoek om insette te lewer oor Eskom se voorgestelde 400kV-kraglyn in die Tuinroete en Klein- en Sentraal-Karoo.
Die projek sluit die konstruksie van die Gourikwa-Blanco-Droërivier 400kV kraglyn en substasies in," sê Marinda le Roux, projekbestuurder van Envirolution, wat die omgewingsimpak-studie doen.
Volgens Le Roux sluit die konstruksie die oprig van 'n 400kV transmissielyn van tussen 50 en 60 km in vanaf die Gourikwa-substasie in Mosselbaai tot by die Blanco-substasie in George, asook die konstruksie van 'n 400kV-transmissielyn vanaf Blanco-substasie tot by die Droërivier-substasie op Beaufort-Wes.
Belanghebbendes wat deur die roete van 'n serwituut geraak word, word versoek om aan die openbare deelname-proses deel te neem. Indien hierdie roetes nie haalbaar is nie, sal alternatiewe roetes ondersoek word.
"Die beplande kraglyn loop langs die Tuinroete, oor die omgewingsensitiewe Swartberg-natuurreservaat, wat 'n Unesco Wêrelderfenisterrein is, en deur die Klein- en Sentraal Karoo."
Volgens Le Roux word 'n korridor van sowat 1 km breed ondersoek, maar slegs 62 m word vir die kraglyn-serwituut benodig.
"Voordat daar op spesifieke belyning besluit word moet die impak op onder meer natuurlewe, besighede, toerisme en plaasbedrywighede ondersoek word. Hierdie inligting word aan die department van omgewingsake voorgelê vir besluitneming."
- grondgebruik en stads- en streekbeplanning;
- landboubedrywighede;
- die voorkoms van rivierstelsels en vleilande;
- 'n opname van plante voëls en diere;
- ekonomiese bedrywighede in die korridor, insluitend toerismebedrywighede;
- die voorkoms van terreine van erfenis-, argeologiese en paleontologiese belang;
- die visuele impak van die transmissielyn; en
- die sosiale impak daarvan.
Kundiges is ook aangestel om die openbare deelname-proses te fasiliteer tydens vergade-rings op Mosselbaai, George, Beaufort-Wes en moontlik ook Uniondale. Om deel te neem aan die proses is dit nodig dat belanghebbendes registreer.
Die belanghebbendes sal na die vergaderings genooi word wat in Junie gehou sal word.
"Daar word op 25 en 28 Mei insette gegee ten tye van vergaderings van landbouverenigings, maar publieke vergaderings word beplan vir Junie in bepaalde dorpe wat naby die lyne geleë is," sê Le Roux. Boere word versoek om dringend met hul landbouverenigings kontak te maak met betrekking tot hierdie vergaderings.
Die datums en tye sal afhang van die beskikbaarheid van belangegroepe, kundiges, die projekspan en Eskom se verteenwoordigers.
Bestudeer die meegaande kaarte om te bepaal of u eiendom daardeur geraak word, en registreer onverwyld as belanghebbende.
Vir meer inligting, kontak Marinda le Roux by 061 417 4281 of marinda@envirolution.co.za of Sam Scott by sam@envirolution.co.za of 083 586 2906, of besoek die webblad www.envirolution.co.za.
Bo en onder: Kaarte dui die roete in die Tuinroete en deur Klein- en Sentraal-Karoo aan.
