Update
DE RUST NUUS - Die winkelier wat op Kersdag in Blomnek, De Rust, op ‘n klag van moord in hegtenis geneem is, het Maandag in die Oudtshoorn-landdroshof borgtog van R500 gekry.
Rahael Ahmed (34) van Bangladesh word van moord op die 24-jarige Fernando Benn aangekla.
Die voorval het op Kersfees in Dwarsweg, Blomnek plaasgevind toe daar 'n onderonsie tussen die beskuldigde en die oorledene was.
Die ondersoekbeampte, sers Ricardo Jullius, het die hof meegedeel dat die beskuldigde tydens ‘n struweling met die oorledene een keer met ‘n skerp voorwerp gesteek is.
Hy het die oorledene daarna twee steekwonde, een in die nek en een in die bors, toegedien.
Paramedici het Benn later op die toneel dood verklaar.
Borgtog is nie teengestaan nie omdat die beskuldigde oor ‘n alternatiewe blyplek beskik en sy volle samewerking met die polisie gegee het.
Jullius het die hof versoek om streng borgvoorwaardes te stel.
Ahmed se regsverteenwoordiger. Adv. Shaun Ferreira, het gesê dat dit in belang van geregtigheid is dat borgtog toegestaan word.
Landdros Marvin de Vos het borgtog toegestaan op voorwaarde dat die beskuldigde nie kontak maak met staatsgetuies of hulle probeer beïnvloed nie.
Voorts moet hy elke Maandag en Vrydag tussen 06:00 en 18:00 by die Oudtshoorn polisiekantoor aanmeld en nie op De Rust kom voordat die saak afgehandel is nie.
Hy moet ook by die alternatiewe adres te Rose Valley op Oudtshoorn tuisgaan.
Die saak is uitgestel tot 8 Februarie 2021. Stephanie Strydom is die aanklaer.
Lede van die polisie se eenheid vir openbare orde moes na die voorval ingryp om woedende inwoners uiteen te jaag. Met die aankoms van die Oudtshoorn Courant op die toneel op Kersdag, was die liggaam reeds verwyder en Ahmed en van sy kollegas was reeds by die De Rust-polisiestasie, maar in die afwesigheid van die polisie het mense die winkel geplunder en met armsvol voorraad uit die winkel gestroom. Hulle is uitmekaar toe die polisie later weer teruggekeer het.
Sewe mans van die woonbuurt is intussen in hegtenis geneem vir huisbraak en diefstal. Percival van Schalkwyk (29), Pieter Damons (20), Lluwellyn Swart (24), Isadore Sauls (31), Simon Lisoona (31), Lenis January (19) en Herchelle Adams (22), is aangekeer nadat hulle glo na die voorval by die spazawinkel ingebreek en geld en ander items gesteel het. Hulle het ook Maandag in die hof verskyn. Hulle is vasgetrek danksy videokameras binne die winkel. Die sewe is deur landdros De Vos gewaarsku om die klaer uit te los en vrygelaat. Die saak is uitgestel tot 27 Januarie.
Ahmed se vennoot het op Kersdag by die polisiestasie aan die Oudtshoorn Courant gesê die hele voorval binne die winkel is op kamera vasgelê. Voertuie van die winkeleienaars sowel as polisievoertuie is tydens die oproer na die dood van Benn met klippe en bakstene beskadig.
Inwoners van Blomnek voor die winkel waar Fernando Benn noodlottig gewond is. Foto's Hannes Visser
'Ons bring jou die nuutste Klein Karoo nuus'
