OUDTSHOORN NUUS - Die 1985 matrikulante van Bridgton Sekondêr het na 30 jaar uiteindelik hul matriekafskeid gehou.
Die reünie van die matrikulante die afgelope naweek was 'n spesiale aangeleentheid omdat dit nie net die geleentheid gebied het vir die leerders om na drie dekades weer bymekaar uit te kom nie, maar ook om hul matriekafskeid te hou.
Kenneth Booysen, die hoofseun van 1985 sê: "Ons het nie die geleentheid gehad om 'n formele matriekafskeid te hou nie en het dit Vrydagaand in styl gevier. Die spog geleentheid was inderdaad die hoogtepunt van die naweek. Die oudleerders was uitgevat in hul spog drag vir die aand met 'n professionele orkes en die aand was 'n reusesukses."
'n Kers is ook aangesteek ter nagedagtenis aan leerders en onderwysers van daardie jaar wat reeds oorlede is.
Volgens Booysen het die matrieks van 1985 destyds besluit om nie 'n formele matriekafskeid te hou nie uit protes teen die apartheidsregering se noodtoestand wat ook op Oudtshoorn verklaar was en die skool spesifiek geraak het.
Talle leerders van die skool en nie matrikulante nie, is daagliks ondervra en deur die polisie opgesluit. Baie leerders kon nie in hul huise slaap nie uit vrees vir polisie aanranding.
Die skoolhoof, Fred Hendricks, was ook gedurende daardie tyd in polisie-aanhouding en is verbied om leerders toe te spreek. Die polisie het daagliks die skoolterrein met honde betree en leerders aangerand. Daar was effektiewelik sedert Julie daardie jaar feitlik geen formele onderrig moontlik nie.
"Die matrikulante het gevoel dat daar geen sin in was om hul matriekjaar te vier nie," sê Booysen.
Die oudmatrikulante het die skool en personeel Vrydagaand bedank vir die hoë gehalte opvoeding wat hul bemagtig het om beter mense te kan wees.
"Ons kon inspirasie vind uit die skool se leuse: Facta non Verba- Dade nie Woorde," het Booysen gesê.
Ongeag die ontwrigtinge van 1985 kon baie matrieks steeds bo hul omstandighede uitstyg en het hierdie groep vir 'n spesifieke matriekjaar groot getalle professionele mense insluitende, onderwysers, ambagsmanne en -vroue, staats-amptenare, entrepreneurs in konstruksie, dokters, aanklaers, prokureurs, senior polisielede en soldate, wetenskaplikes en gesondheidspersoneel en predikante opgelewer.
Die groep het die skoolhoof se uitnodiging aanvaar om deel te wees van die skool se 40ste bestaansjaar her-denkinge volgende jaar.
ARTIKEL EN FOTO: GARNETT WICOMB, OUDTSHOORN COURANT KORRESPONDENT
'Ons bring jou die nuutste Oudtshoorn, Klein-Karoo nuus'
