OUDTSHOORN NUUS - 'n Tweede kind het eergister hier in die rondgaande hooggeregshof deur middel van 'n tussenganger getuig in die saak teen die voormalige weermagmajoor en twee vroue wat tereg staan op 22 klagtes van onder andere verkragting, ontvoering en mensehandel vir seksuele uitbuiting.
Jooste word daarvan aangekla dat hy seksueel verkeer het met die meisies van onderskeidelik 11, 13 en 14 jaar, en die twee vroue dat hulle saamgesweer het om die meisies teen betaling na sy huis te neem.
Jooste en Stoffels word ook daarvan aangekla dat hulle twee van die jong kinders vanuit die sorg van hul ouers geneem en by Stoffels se woning laat oorslaap het.
'n Maatskaplike werker Megan Square, het Woensdag die hof versoek om nie die 14-jarige meisie in 'n ope hof te laat getuig nie omdat sy minderjarig en nie gemaklik sal wees nie.
"Dit is in die beste belang van die kind om haar te beskerm. Sy het die ondersteuning van 'n tussenganger nodig en het ook nie ver gevorder op skool nie," het Square gesê.
Jooste se regsverteenwoordiger, Gideon Badenhorst, het aan Square gevra of sy daarvan bewus is dat die meisie al voorheen in die hof verskyn het.
Hy wou ook weet of sy daarvan bewus is dat die meisies vir Jooste geskakel en een van hulle glo self haar klere in Jooste se huis uitgetrek het.
Square kon nie op 'n vraag van die regter, of Jooste steeds 'n majoor in die weermag was ten tyde van die beweerde verkragtings, antwoord nie.
'n 12-jarige meisie het ook reeds deur middel van 'n tussenganger en geslotekringtelevisie getuig terwyl haar ma ook vroeër die week getuienis gelewer het.
Die kind het volgens haar nie die aand van 25 Junie 2014 by die huis geslaap nie en die volgende oggend met 'n groen kombers oor haar tuisgekom. Sy kon nie presies sê waar sy oornag het nie.
'n Vrou wat in dieselfde straat woon. Yolande Botha, het getuig dat sy die kind en Felicity Stoffels, by almal bekend as Meitjie, die betrokke aand saam sien stap het.
Sy het ook gehoor hoedat Stoffels op haar selfoon praat en glo gesê het: "Ons is nou by die pad."
Later die aand het Stoffels haar gevra om tog vir niemand te sê dat sy hulle gesien het nie en dat sy immers "bewysstukke sal moet hê".
Die geneesheer wat twee van die meisies ondersoek het, dr. Stephanie Ayres, en nog 'n maatskaplike werker, Lendricka Jones, was die eerste getuies wat deur die staat geroep is.
Volgens Ayres het die twee nie enige bese-rings opgedoen nie.
Jones sê in haar agtergrondverslag dat die 12-jarige meisie baie skaam was om oor die voorval te praat en daarna glo bang is om alleen winkel toe te stap.
Die beweerde verkragting het 'n "merkwaardige impak" op haar gehad en sy skrik nog snags wakker, weier om met maatjies te speel en is volgens haar moeder soms hardkoppig.
Sy het aanbeveel dat die kind nie in 'n ope hof getuig nie omdat dit onredelike geestes-spanning sal veroorsaak. Sy is nie vertroud met hofprosedures nie.
Die saak dien voor regter Sakkie van Staden wat bygestaan word deur 'n assessor, adv. Stoffel Prinsloo. Adv. Mornay Julius is die aanklaer.
Mnr. Gideon Badenhorst verskyn namens Jooste en mnr. Vaughn Shone namens die twee vroue. Ao. Flip Jacobs is die ondersoekbeampte.
Klik hier vir vorige artikels:
- Opvolg: Man koop glo meisies vir seks
- Man koop glo meisies vir seks
- Verkragtingsaak oorgeplaas na hooggeregshof
- Man wat glo kinders verkrag vandag weer voor hof
ARTIKEL: GARNETT WICOMB, OUDTSHOORN COURANT - KORRESPONDENT
