OUDTSHOORN NUUSFLITS - 'n Kontrakteur van Oudtshoorn is vanmiddag by die stortingsterrein met 'n skroewedraaier gesteek.
Johan Swanepoel, sy buurman en 'n werker het bourommel by die strotingsterrein afgelaai toe ongeveer 5 mans op sy Hyundai bakkie gespring het. Hy het hulle afgejaag en gesê hy en sy helpers sal self aflaai. Daar het 'n stryery tussen home en een van die leeglêers ontstaan.
"Ek het gesien die man raak agressief toe het ek in die bakkie ingeklim, maar hy het die deur oopgeruk. Ek het hom weggestamp en hom met die hand op die neus getref. Hy het 'n skroewedraaier wat agter my sitplek gelê het gegryp en my gesteek. Hy het ook my bakkie se sleutels uitgeruk."
Volgens Swanepoel kon hy daarin slaag om die sleutels terug te kry en weg te jaag. Op daardie stadium het ongeveer 15 mense om sy bakkie saamgedrom en hom en sy twee passasiers gedreig.
Hy is deur 'n dokter vir twee steekwonde behandel en moes ook X-strale laat neem. Hy het klagtes by die munisipaliteit en die SAPD gelê.
"Ek wil mense dringend waarsku om nie die stortingsterrein te gebruik nie. Die plek is nie veilig nie en die munisipaliteit moet toesien dat daar alternatiewe maniere is om van tuinvullis en bourommel ontslae te raak," het hy gesê.
Swanepoel in sy bakkie waarmee hy bourommel afgelaai het.
Lees meer in Vrydag se Oudtshoorn Courant, asook aanlyn.
ARTIKEL & FOTO'S: HANNES VISSER, OUDTSHOORN COURANT-REDAKTEUR
'Ons bring jou die nuutste Oudtshoorn, Klein Karoo nuus'
