Honderde by begrafnis van ma en seun

Update

OUDTSHOORN NUUS - Honderde inwoners van Bridgton het Sondag 15 Oktober die St Nicholas Rooms-Katolieke Kerk volgepak om hul laaste eer te betoon aan 'n ma en seun wat op 2 Oktober doodgebrand het toe hul opslaanhut aan die brand geslaan het.

Shirley 'Tilla' Bezuidenhout (49) en haar 15-jarige seun Warren, alombekend as Wakkie Boy, het doodgebrand nadat 'n kers vermoedelik omgeval het.

Familielede en vriende het tydens 'n kransleggingsdiens na die tragiese voorval in Steenboklaan, Bridgton, wat deur Oudtshoorn Community Against Crime (OCAC) gehou is, hulde gebring aan Shirley wat hulle as 'n "mense-mens" beskryf het, en iemand wat nie geskroom het om haar sê te sê nie.

Haar dogter, Celay (18), 'n matriekleerder aan Aurial Kollege, het in 'n kort boodskap haar dank uitgespreek teenoor almal wat haar ondersteun.

Volgens haar sal sy haar ma as 'n liefdevolle, kunstige mens onthou en haar broer as 'n lewenslustige persoon wat altyd grappies vertel het.

Die skoolhoof van Aurial Kollege, Karin Alexander, het beloof dat die skool Celay sal ondersteun in dié moeilike tyd en die matriekeksamen wat voorlê.

Volgens Alexander sal sy Celay se ma onthou as een van die ouers wat elke skoolgeleentheid bygewoon het. Sy weet dat Celay haar ma geëer het en God dit raaksien.

Vorige artikel: 3 brand dood in 2 dae