OUDTSHOORN NUUS - 'n Leerder van Langenhoven Gimnasium het bewys dat haar skryftalent kop en skouers bo ander uitstaan.
Anna-Mart Schutte het haar bydrae ingeskryf as deel van Huisgenoot se eeufeesherdenking en het as die wenner weggestap.
Haar pennevrug is as die weninskrywing aangewys en het op 14 Julie in die Huisgenoot verskyn. Hier volg haar wengedig:
Fluit, fluit jou storie is nog lank nie uit
En die ABC is te min, om jou eeu te besing.
Ons gaan nou Sakkie en Samba, rymklets en riel,
Omdat jy ons mense so besiel!
Ons Afskop is met Adoons, Annie-en-Sol en Bles-se-moles. Bollie word Bobo en ons Cha-Cha deur hartekoning Chris, Cora Marie en vet Careltjie wat sterf.
Van Dealesville na Dallas kap ons dit uit en drie-stap-draai om Ena Murray, Frik du Preez, Fifa en Fransie-die-oumenskind.
Ons Foxtrot van Fanie-en-Melanie na Glenda se luislang en Garies se gaga melk. Ons huppel saam met Heidi in berge, deur Hanna-se-Hoekoms, Huisgenotjies, Isidingo en Idols.
Jive met John Wayne en JanPickard tot by Karmenaadjies en Kat-astrofes, soos die Laingsburg-vloed en Lady Di. Saam met Liewe Heksie Masurka ons oor Margaret Gardiner, Murray Jansen, Madiba tot by Madam & Eve en draai dan kringe om Naas, die goue-geldlose-seun, 'n negejarige-wat-'n-baba-kry.
Oscar en die Olifantman.
Ons Polka en Pata om Paul Kruger en Peanuts en Quickstep tot by die Queen van Engeland. Dan Rumba en Rock ons oor Ritssluier rooi-verhale en Resepte-van-die-week.Ons Sakkie-Sakkie en Samba deur Sudoku, Sake-van-die-Hart en Ses-soorte-hoes en Tango en Tiekiedraai weer terug met Trevor Noah, tatoes en tweekopbabas. 'n Uitskoppassie vir Ubuntu en Universiteitsgelde…
Vir poppiedik-en-potjierol, Van Nataniel se lensies-vir-platter-pensies, wals ons verby Wors-en-Mollie, die Weerwolfkinders, op soek na die X-faktor. Met 'n Kokkedy-en Hopsapassie wip ons deur Ystervarkiesresepte, Zephany Nurse, Zoid Afrika, Zuma en gee die laaste tree saam met die kaalvoetdrawwertjie Zola…
Fluit, fluit die alfabet is uit…
Maar 'n eeu is te min
Om HUISGENOOT te besing.
'Ons bring jou die nuutste Oudtshoorn, Klein Karoo nuus'
