OUDTSHOORN NUUS - Die Phelophepa-gesondheids-trein besoek Oudtshoorn volgende week. Die trein wat basiese gesondheidsorg aan minderbevoorregtes in landelike gebiede lewer, sal vanaf Maandag 24 tot Vrydag 28 Augustus by die Oudtshoorn-stasie wees.
Die trein word beman deur afdelingsbestuurders, twee oogkundiges, 'n tandarts en tande-sorg personeel, drie verpleërs, 'n apteker, 'n sielkundige en beraders. Mediese studente in hul finale jaar sowel as sestien sekerheidsbeamptes is ook deel van die span.
Die Phelophepa-trein bied die volgende dienste teen minimale koste:
- 'n Opvoedkundige kliniek om die publiek in te lig oor gesondheidskwessies soos MIV/Vigs , TB, ontwatering, voeding en algemene gesondheidskwessies;
- 'n Gesondheidskliniek wat algemene mediese ondersoeke doen;
- 'n Oogkliniek wat oogtoetse gratis doen en brille teen slegs R30 elk verskaf. Die kliniek voer nie operasies uit nie;
- 'n Tandheelkunde kliniek waar tande getrek of gevul word en ook skoongemaak word. Die koste beloop R10 vir een of twee tande en R15 vir meer tande. Kinders onder 16 word gratis behandel;
- 'n Sielkundige beradingsdiens waar individuele berading deur 'n sielkundige en opgeleide bera-ders gegee word;
- 'n Apteek waar voorgeskrewe medisyne teen R5 per voorskrif bekom kan word.
Die dienste is daagliks vanaf 07:30 beskikbaar en inwoners word gevra om nie tot die laaste dag te wag nie aangesien daar dan 'n groot opeenhoping van pasiënte sal wees.
Daar word geen vooraf afsprake gemaak nie, wie eerste by die trein is word eerste gehelp.
Boere en industrieë kan wel vooraf reël indien hulle groepe werkers wil stuur. Hierdie reëlings kan met Laurika du Bois by
082 886 5583 getref word.
'Ons bring jou die nuutste Oudtshoorn, Klein-Karoo nuus'
