OUDTSHOORN NUUS - Die Groter Oudtshoorn-munisipaliteit het die Container Hub op Donderdag 16 November bekendgestel en die eenhede amptelik vir besigheid geopen.
Die vestiging van die eenhede was 'n gesamentlike poging tussen die munisipaliteit se departement van beplanning en ontwikkeling, die provinsiale departement van plaaslike regering en die departement van ekonomiese ontwikkeling en toerisme.
Luidens 'n verklaring van die munisipaliteit het Lluwellyn Coetzee, senior bestuurder van die beplannings- en ontwikkelingsafdeling, die belangrikheid van die geleentheid beklemtoon en aan die begunstigdes verklaar: "Dit is net die begin vir jou. Jy word die kans gegun om jou besigheid te laat groei, so gryp hierdie geleentheid aan en maak gebruik van dit."
Die burgemeester van die Groter Oudtshoorn, Chris Macpherson, het gemeenskapseienaarskap beklemtoon en gesê: "Beskerm die Container Hub, dit is jou sleutel tot plaaslike besigheidsgroei."
Macpherson het die langdurige pogings om sake direk na die mense te bring uiteengesit, met die fokus op die verskaffing van daaglikse benodigdhede aan gemeenskappe, veral in landelike gebiede.
Hy het ook Van Der Bergh Transport en Herotel bedank vir hul bydraes. Hy het klem gelê op bekostigbaarheid vir beginner besigheidseienaars en die munisipaliteit se verbintenis om sukses te bevorder.
"Besighede wat hier gevestig is, betaal 'n beskeie maandelikse fooi vir die houer. Ek hoop om hierdie besighede te sien groei en integrale dele van Oudtshoorn se ekonomie te word. Sukses sal hulle in staat stel om personeel aan te stel, vaardighede oor te dra en by te dra tot die plaaslike ekonomie."
Die vennootskappe tussen Oudtshoorn-munisipaliteit, Seda (Small Enterprise Development Agency) en Oudled (Oudtshoorn Local Economic Development Taskforce) het bygedra tot die suksesvolle bekendstelling en sal help met netwerkinisiatiewe.
Morné Pretorius van die departement van plaaslike regering: Thusong-program, het sy trots uitgespreek oor die transformasie.
“Dit het baie mense gekos om hierdie platform vir klein besighede te skep, so besit dit en neem verantwoordelikheid.”
Barbara Owen, portefeuljevoorsitter van die beplannings- en ontwikkelingsdepartement, het die deelnemers verwelkom.
Die Container Hub, met 'n totale koste van meer as R2 miljoen, het ook bykomende finansiering van R1,7 miljoen ontvang vir sonpanele en terreinopgraderings.
Voor, van links is Walter Hendricks (munisipale bestuurder), Sonia Bentley, Fayruz Dharsey (departement van ekonomiese ontwikkel en toerisme), raadslid Barbara Owen en raadslid Zoe TyaTya. Agter staan burgemeester Chris Macpherson, Morne Pretorius (departement plaaslike regering, raadslid Nomsa Jaxa en Lluwellyn Coetzee (senior bestuurder beplanning en ontwikkeling).
‘Ons bring jou die nuutste Tuinroete, Hessequa, Karoo nuus’
