William Mutasa (36) en sy vrou Agnes (30) is kort voor 21:00 op 5 Mei op die sementpad tussen Calitzdorp en Oudtshoorn voorgelê nadat die Oudtshoorn-veediefstaleenheid (OVE) 'n wenk ontvang het.
Twee voersakke met 11,5 kg volstruisvere ter waarde van R14 700 is in hul besit gevind. Hulle het nie oor die nodige dokumente beskik wat hulle toestemming gee om die vere te vervoer nie.
Die oorsprong van die vere is nie bekend nie, omdat geen boer nog na vore gekom het om diefstal van volstruisvere aan te meld nie.
"Die egpaar se inhegtenisneming bring ons 'n tree nader aan die sleutelpersoon of -persone agter die netwerk van volstruisveerdiewe. Uiteindelik gaan ons hulle vastrek en die vlaag van verediefstal hokslaan."
Die netwerk se modus operandi is om werklose mense in die townships met drank, dwelms en 'n paar rand om te koop om volstruisvere te steel," sê adjudant-offisier Fasie de Kock van die OVE. "Soms word selfs plaaswerkers betaal om die vere te pluk of uit die stoorplek te steel."
De Kock skryf die volgehoue voorkoms van volstruisveerdiefstal toe aan 'n wêreldwye tekort aan volstruisvere. "Sedert die uitbreek van voëlgriep in 2011 is daar aansienlik minder uitskotvere by wettige afsetpunte beskikbaar. Mense wat verestoffers maak en op straat verkoop kan dus nie vere wettig bekom nie."
Die bloedige praktyk om vere wat nog nie 'ryp' is nie te pluk, lei dikwels daartoe dat die beseerde volstruise van kant gemaak moet word. Die bloederige vere word nie behandel nie en hou dus die moontlikheid in om die AI-virus te versprei.
Volgens De Kock word die gesteelde vere onder meer met passasiersbusse tot so ver as Malawi geneem. "Op hierdie manier kan AI, wat in die formele volstruisbedryf baie streng beheer word, letterlik landuit gesmokkel word."
Die egpaar het op 8 Mei in die Oudtshoorn-landdroshof verskyn en is op eie verantwoordelikheid vrygelaat. Hulle verskyn weer op 26 Mei.
Ses verediewe is vroeër vanjaar elk tot vyf jaar gevangenisstraf gevonnis.
Klik hier vir verwante artikels:
- Egpaar vas vir verediefstal
- Verediefstal-saak uitgestel
- Slag teen volstruisveermisdrywe
- Volstruisveerdiewe kry 5 jaar tronkstraf
- Volstruisveerdiewe vasgetrek
ARTIKEL: TISHA STEYN, OUDTSHOORN COURANT KORRESPONDENT.
'Ons bring jou die nuutste Oudtshoorn, Klein-Karoo nuus'
