Chinees met moordplanne kry tronkstraf

OUDTSHOORN NUUS - Die Chinese burger, Gaushun Gao (51), wat aan poging tot sameswering om te moor skuldig bevind is, is verlede Woensdag in die Oudtshoorn-streekhof, 26 maande nadat hy in September 2014 in hegtenis geneem is, tot vyf jaar gevangenisstraf gevonnis.

Gao is daarvan aangekla dat hy twee mans van Pacaltsdorp, Eugene Viljoen en Curt-Lee Potts gehuur het om die eienaar van Bagley's Nagklub op Oudtshoorn, Julia Bagley, vir R10 000 te vermoor nadat die nagklub gesluit is omdat hy sonder 'n dranklisensie besigheid gedoen het.

Landdros Mark van Wyngaardt het met vonnisoplegging gesê 'n opgeskorte vonnis soos versoek deur Gao se nuwe regsverteenwoordiger, Johannes Mokopedi van Van Velden-Duffey Prokureurs van Rustenburg, sou heeltemal onvanpas wees vir die ernstige misdaad.

Volgens Mokopedi word Gao in die hospitaal-afdeling van die tronk aangehou en ondervind hy probleme om met die tronkpersoneel te kommunikeer. Hy is ook die enigste Chinees in die gevangenis en sy gesondheid gaan agteruit.

Hy het die hof vir 'n opgeskorte vonnis gevra wat soos 'n swaard oor die beskuldigde se kop sal hang. Hy het self sowat R500 000 verloor in 'n transaksie wat skeefgeloop het.

Die staatsaanklaer, adv. Michelle Weyers, het die hof vir direkte gevangenisstraf gevra omdat dit die enigste gepaste vonnis sal wees. "Die hof moet ook kyk wat Julia Bagley deurgemaak het en die effek op haar lewe. Sy leef in vrees vir die beskuldigde," het Weyers gesê.

Volgens haar was Gao se aksies 100% om die vrou te laat doodmaak.

Sy wou weet watter indruk dit in die gemeenskap sal skep indien 'n opgeskorte vonnis opgelê sou word.

Volgens die landdros was dit net die onwilligheid van die twee vermeende huurmoordenaars, wat tot die mislukking van Gao se plan gelei het. "Hulle wou nie regtig die vrou doodmaak nie, maar net 'n paar vinnige sente uit Gao maak," het die landdros gesê.

"Om mense te laat doodmaak is iets wat deesdae te algemeen in Suid-Afrika voorkom."

Volgens die landdros het Gao besluit om nie te getuig nie en weet die hof nie presies wat agter die kap van die byl lê nie.

Die hof verstaan ook dat hy nie ver op skool gevorder het nie. Hy het egter die wet in eie hande geneem en besluit om mense vir 'n moord te huur, maar het gelukkig nie in sy doel geslaag nie.

Gelukkig is niemand beseer of dood nie, maar dit bly 'n ernstige misdryf, het die landdros gesê.

"Daar is ander wettige maniere om mislukte transaksies op te los," het die landdros gesê.

Die hof het in ag geneem dat hy reeds vir meer as 26 maande in aanhouding is en ook 'n eerste oortreder is. Gao toon egter geen berou nie en die hof moet keer dat die gemeenskap nie die reg in eie hande neem nie.

Hy is onbevoeg verklaar om 'n vuurwapenlisensie te bekom.

Klik hier vir vorige artikels: