OUDTSHOORN NUUS - Tien springbokke en vier koedoes wat Sondag buite De Rust uit 'n onderstebo sleepwa bevry is, is springlewendig.
"Hulle is almal op die been behalwe een springbokkie wat nog bietjie mank en gekneus is," het Gary Smith, eienaar van Shagaly-wildsplaas naby Van Wyksdorp gister gesê.
'n Springbok en 'n koedoe is in die ongeluk dood.
Smith was aan die stuur van sy bakkie wat 'n groot sleepwa met 16 bokke gesleep het toe die ongeluk gebeur het. Hy vertel dat die sleepwa net buite De Rust skielik begin heen en weer swaai en toe regs van die bakkie van die pad afgeloop en omgeslaan het. Dit blyk dat die kop van die sleepwa se sleepstang losgebreek het.
'n Boer wat toevallig agter die sleepwa gery het, het bevestig dat daar nie ander voertuie betrokke was nie en dat hulle nie vinnig gery het nie.
Die sleepwa met 11 springbokke en 5 koedoes, wat Smith die vorige dag op 'n veiling in Beaufort-Wes gekoop het, het op sy dak in die veld te lande gekom. 'n Sleepwa wat geskik is vir die vervoer van wild, asook 'n sleepwa vir perde is na die toneel gebring om die bokke verder te vervoer.
Die eienaar van Karoo Game in Beaufort-Wes waar die veiling gehou is, het ook van sy personeel en 'n vragmotor gestuur om bystand te verleen. Dr. Willem Burger, veearts van Oudtshoorn is ontbied om te help met die verdowing en oorlaai van die getraumatiseerde bokke.
Kyk na 'n video hier onder:
As voorsorgmaatreël het provinsiale verkeersbeamptes die pad vir 'n kort ruk gesluit terwyl die springbokke oorgelaai is. Die koedoes is verdoof voordat hulle verwyder en oorgedra is.
Lede van De Rust se gemeenskap het koffie, beskuit en sop vir die helpers gebring. Smith was hierdie week vol lof vir die wyse waarop die veearts, boere van De Rust, die verkeersdepartement en polisie hulp verleen het.
"Sê asseblief namens my baie dankie aan almal wat gehelp het, ek het groot waardering daarvoor," het hy gister telefonies gesê.
Die ongeluk het net voor 11:00 plaasgevind en die bokke is teen 15:00 oorgelaai en weggeneem.
Verwante artikels:
- Wildveiling behaal R2 miljoen-omset
- 5de Karoo Game-wildveiling op 30 Mei
- Groot wildveiling op 30 Mei
Volgens die bestuurder van die voertuig het die kop van die sleepwa se sleepstang losgebreek waarna die sleepwa gerol het.
Boere van De Rust het 'n veearts en die eienaar van die wild bygestaan terwyl die bokke verdoof is en in ander sleepwaens oorgelaai is.
Polisie op die toneel.
ARTIKEL, VIDEO EN FOTO'S: HANNES VISSER, OUDTSHOORN COURANT-REDAKTEUR.
'Ons bring jou die nuutste Oudtshoorn, Klein-Karoo nuus'
