OUDTSHOORN NUUS - Ben Vrey Snr, die sakeman wat in 2012 op vier klagtes van seksuele teistering in hegtenis geneem is, is Dinsdag in die Oudtshoorn streekhof tot vyf jaar gevangenisstraf gevonnis.
Vrey is in Oktober vanjaar op drie van die vier klagtes skuldig bevind.
Drie van die klaagsters was tydens die voorvalle kelnerinne wat in sy restaurant gewerk het en die vierde is 'n meisie wat toe 13 jaar oud was. Die drie klagtes waaraan landdros Daniel Boks Vrey skuldig bevind het handel oor die meisies wat vir Vrey in die restaurant gewerk het.
Volgens die klagstaat het die kelnerinne gesê dat hy ondermeer aan hulle boude en vrouedele gevat het en ook sy tong in een kelnerin se mond gedruk het.
Adv. Alfred Schmidt het in opdrag van Vrey se prokureur, mnr. Louis Oosthuizen, opgetree. Schmidt het Dinsdag reeds teen die skuldigbevinding sowel as die vonnis geappelleer, maar landdros Daniel Boks het dit nie toegestaan nie.
Boks het gesê dat Vrey 'n sesde (10 maande) van sy vonnis moet uitdien, die res van die vyf jaar sal korrektiewe toesig wees.
Schmidt het in sy slotbetoog gesê dat die hof in ag moet neem dat Vrey aan bykans 100 mense werk verskaf deur sy boukontrakteursmaatskappy en dat die klagtes wat tans voor die hof is nie die heel ernstigste klagtes is wat die hof al ooit aangehoor het nie.
"Ek praat dit nie weg nie, en ek sê ook nie dat dit reg is nie, maar die hof moet in ag neem dat dit nie van die ergste klagtes is nie. Dit is ook die beskuldigde se eerste oortre-ding," het Schmidt gesê.
Hy het ook genoem dat dit wat een van die klaagsters onder eed in die hof getuig verskil van dit wat in die korrektiewe dienste verslag is. Hy het verder genoem dat berou 'n moeilike onderwerp is.
"My kliënt kan voorhou dat hy baie jammer is oor wat hy gedoen het al voel hy in sy hart hy het dit nie gedoen. Hy kan nie van sy hart 'n moordkuil maak nie en hy bly getrou aan dit wat hy in sy hart voel. Dit sal vals wees om nou 'n front voor te hou net omdat hy skuldig bevind is," het Schmidt gelas.
Adv. Michelle Weyers, wat vir die staat opgetree het, het in haar slot betoog gesê dat die klaagsters erg getraumatiseerd was gedurende die hofsaak en dat hulle met tye die kruisondervraging moes onderbreek omdat die klaagsters in die getuiebank emosioneel geraak het.
Sy het ook gesê dat een van die klaagsters minderjarig was en dat dit voorgekom het asof Vrey sy magsposisie as werkgewer misbruik het. Sy het verder gesê dat een van die klaagsters weens spanning in die hospitaal opgeneem is in die tyd wat sy by die restaurant gemolesteer is.
Die erg geskokte Vrey het na die afloop van die appèlaansoek die hof saam met die polisie verlaat.
ARTIKEL: LIEZL VAN NIEKERK, OUDTSHOORN COURANT-JOERNALIS
'Ons bring jou die nuutste Oudtshorn, Klein-Karoo nuus'
