OUDTSHOORN NUUS - Hy's nie dood nie, en nog springlewendig.
So sê die bekende sakeman van Oudtshoorn, Aubrey Wesso, wie se doodstyding verlede week soos 'n veldbrand versprei het.
"Hoeveel, indien enige, van ons is dit beskore om sy eie heengaan en begrafnisreëlings te beleef," vra Wesso Maandag met 'n groot glimlag.
"Wel dit is wat ek onlangs beleef het."
Volgens Wesso moes hy net na Nuwejaar onverwags 'n voetoperasie in die Mediclinic ondergaan.
Die operasie was suksesvol en hy moes 'n paar dae in die hospitaal aansterk.
Intussen het sy besigheid, Westcottpark Drankwinkel in Toekomsrus gesluit gestaan en dit is toe dat die bespiegelinge begin.
"Dis verbasend hoe kreatief mense se verbeelding kan wees en onmiddellik het stories oor my dood, en selfs my begrafnis tot sover as Stellenbosch en Kaapstad versprei."
Wesso sê hy beskou die gerugte nie as kwaadwillig nie. "Ek is vandag dankbaar dat ek die afgelope 30 jaar nie een dag met siekteverlof was nie en bedank almal se goeie wense en gebede."
Wesso sê hy hoop om binne ses of sewe weke te herstel maar tref intussen alternatiewelike bestuursreëlings om sy besigheid weer aan die gang te kry.
ARTIKEL & FOTO: GARNETT WICOMB, OUDTSHOORN COURANT-KORRESPONDENT
'Ons bring jou die nuutste Oudtshoorn, Klein Karoo nuus'
