OUDTSHOORN NUUS - Verlof om teen sy skuldigbevinding en vonnis te appelleer is Dinsdag in die Oudtshoorn-streekhof aan die voormalige burgemeester van Oudtshoorn, Gordon April, geweier.
Die uitspraak van streeklanddros Mark van Wyngaardt, wat die aansoek aangehoor en steeds met siekteverlof is, is deur streeklanddros Daniel Boks voorgelees.
Dit volg nadat familielede verlede Woensdag met plakkate voor die landdroshof betoog het oor die vertraging met die uitspraak.
Die staatsaanklaer, Tommie Verreyne, wat verlof om te appelleer teengestaan het, het die hof vanmiddag meegedeel dat reëlings met die hooflanddros Jaco Lambrechts en die streekhofkoördineerder, mnr. JC Nortje, getref is dat die uitspraak in belang van geregtigheid skriftelik deurgegee word vir afhandeling.
Van Wyngaardt skryf dat geen aspek in die verhoor oor- of onder beklemtoon is nie en dat hy van mening is 'n ander hof sal nie tot 'n ander bevinding sal kom nie.
Ten opsigte van die vonnis van nege jaar gevangenisstraf, effektief vyf jaar, lui die landdros se uitspraak dat daar geen ongeruimdhede was en dat die vonnis nie skokkend hoog is nie.
"Daar is volgens my geen gronde dat 'n ander hof tot 'n ander bevinding sal kom nie en word die skuldigbevinding en vonnis van die hand gewys."
Aanhangers van April het verlede Woensdag voor die landdroshof betoog teen die vertraging weens die siekte van die betrokke landdros.
April is op 5 April gevonnis nadat hy aan diefstal van sand en klip van die Oudtshoorn-munisipaliteit, die onwettige gebruik van munisipale voertuie, intimidasie en poging tot regsverydeling skuldig bevind en effektiewelik tot vyf jaar gevangenisstraf gevonnis is.
Familielede het na Dinsdag se uitspraak hul teleurstelling met die uitspraak uitgespreek en aangedui dat hulle nie die saak daar sal los nie.
Vaughn Shone, April se prokureur, het aan die Oudtshoorn Courant gesê dat hy 'n petisie teen die landdros se besluit na die hooggeregshof in Kaapstad gaan stuur.
Klik hier vir vorige artikels:
- Oudburgemeester se appèlaansoek geweier
- Oudburgemeester se appèl wéér uitgestel
- April moet nog 'n week wag
- Oudburgemeester se appèl weer uitgestel
- Opvolg: Oudburgemeester bly in aanhouding
- Opvolg: Oudburgemeester kry tronkstraf
- Oudburgemeester môre in hof vir appèl
- Oudburgemeester bly in aanhouding
- Voormalige burgemeester gaan tronk toe
- April in April gevonnis vir diefstal
- Voormalige burgemeester skuldig aan diefstal
- April-diefstalsaak uitgestel
ARTIKEL: GARNETT WICOMB, OUDTSHOORN COURANT-KORRESPONDENT
'Ons bring jou die nuutste Oudtshoorn, Klein Karoo nuus'
