Die werknemers, hul ondersteuners en lede van die nuwe munisipale unie, Municipal Allied Trade Union (Matusa) het vroeg gisteroggend buitebande en ander voorwerpe voor die munisipaliteit aan die brand gesteek in protes teen die beoogde afdankings. Vullis is ook in die straat uitgegooi.
Teen ongeveer 10:00 gisteroggend het die protesoptrede gehalt toe Matusa en afgevaardigdes van die Kannaland-munisipaliteit in begin het met onderhandelinge.
Matusa se waarnemende sekretaris-generaal, Kurt Ziervogel het gisteroggend aan die Oudtshoorn Courant gesê hul lede moes die afgelope naweek vauit die gemeenskap hoor dat 123 tydelike Kannaland-munisipale werkers afgelê gaan word.
Volgens Ziervogel het die munisipaliteit sedert Vrydag kennisgewings in inwoners se posbusse gegooi, waarin die voorneme om die werkers af te lé, op skrif gestel is.
Ziervogel het die Kannalandse ANC/DA-koalisie as onheilig beskryf en gesê: “Water en olie kan nie meng nie.” Hy hou dié koalisie verantwoordelik vir die beoogde aflê van die tydelike werkers.
“Van hulle is al tot solank as ses jaar tydelike werkers, sonder enige voordele wat hulle behoort toe te kom. Ons (Matusa) eis dat hulle permanent aangestel word met volle voordele.
“Dis Kersfees. Hoe durf jy mense hul werk laat verloor hierdie tyd van die jaar,” het Ziervogel gesê.
Ian Avontuur, woordvoerder van Kannaland se burgemeester, Magdelena Barry het vanoggend gesê ‘n volledige persverklaring oor die stand van sake sal later vandag uitgereik word. Volgens Ziervogel is hy in besit van ‘n skrywe waarin die Kannalandse-munisipale raad gister onderneem het om vir eers die afdankings op die ys te plaas.
“Ons is in gesprekvoering oor die aangeleentheid,” het hy bygevoeg.
Lees meer in Vrydag se Oudtshoorn Courant, asook aanlyn.
'Ons bring jou die nuutste Ladismith, Kannaland nuus'
