CALITZDORP NUUS - Die vier mans van Calitzdorp, wat 'n restaurant op die plaas Groenfontein met groot klippe verwoes en aan opsetlike saakbeskadiging, aanranding met die opset om ernstig te beseer en diefstal skuldig bevind is, is elk Maandag in die Oudtshoorn-streekhof vyf jaar gevangenisstraf opgelê.
Streeklanddros Daniel Boks het met die vonnisoplegging van Morné Nel (33), Mervin van Wyngaardt (28), Geraldo Ewerts (22) en Elton van Wyngaardt (26) hul optrede op Paassondag 2015 as bewys van absolute wetteloosheid en barbaarsheid beskryf.
Die Oudtshoorn Courant het in 2015 berig dat die mede-restaurant eienaar, Johann du Plooy, op 5 April beseer is en die Aloe Aloe Restaurant in Groenfontein buite Calitzdorp erg beskadig is na 'n groep aanvallers met wapens die restaurant oorval en beroof het.
Volgens Erika Calitz, die ander eienaar van die restaurant, het die insident gebeur terwyl daar 'n groep mense was wat besig was om middagete te geniet.
"Dit was aaklig. 'n Hele groep aanvallers, van die mense ken ons van die buurplaas af, het met kapmesse, messe en ander handgemaakte wapens ingestorm en mense, waaronder kinders en ouer mense begin aanval. Hulle het Johan du Plooy probeer vermoor," het Calitz vertel.
Volgens haar was dit 'n brutale aanval en het dit gelyk of die aanvallers onder die invloed van dwelms was.
"Hulle het feitlik alles in die restaurant stukkend gegooi en die gaste, onder wie 'n 90-jarige vrou en kinders, vir hul lewens laat vrees."
Die staatsaanklaer, Nadia le Roux, het die hof versoek om direkte gevangenisstraf aan die vier op te lê omdat dit die enigste gepaste vonnis vir hul misdade is.
Volgens haar was die vier se optrede skokkend. Hulle toon nie werklike berou nie en kan nie die skade van meer as R180 000 terugbetaal nie.
Een van die gaste het getuig dat hy bang was hy sal nie die perseel lewend verlaat nie.
Calitz sowel as die gaste het deur enorme trauma gegaan.
"Die beskuldigdes het die reg in eie hande geneem en hul optrede het 'n groot verlies in die klaer se lewe gelaat. Die impak op haar restaurant, gastehuis en donkiekar-staproete was verstommend," het Le Roux gesê.
Die mans se regshulpprokureur, Eugene Roos, het die hof versoek om die maksimum vonnis vir korrektiewe toesig op te lê aangesien die mans almal eerste oortreders is en nie 'n gevaar vir die gemeenskap inhou nie.
"Hierdie was 'n eenmalige voorval onder unieke omstandighede en dit is duidelik dat dit nie weer in die toekoms sal gebeur nie," het Roos betoog.
Die vier is volgens hom nie tronkmateriaal nie en die voorval het reeds in 2015 plaasgevind.
"Dit sal 'n verkeerde boodskap na buite stuur," het die landdros gesê.
Alles in die restaurant, waaronder duur skilderye, 'n antieke vuurwapen, tafels, breekgoed, 'n musiekstelsel en 'n standbeeld van 'n donkie, is met klippe so groot soos spanspekke verwoes. Gaste moes wegkruip en hul kinders versteek terwyl gaspype ook losgeruk is.
"U toon geen respek vir ander se besittings nie en saai helder oordag verwoesting."
Volgens die landdros het die vier mans gesamentlik opgetree en daarom is elkeen ingevolge Artikel 276 (1) (i) tot vyf jaar tronkstraf gevonnis en onbevoeg verklaar om 'n vuurwapen te besit.
Hulle het aangedui dat hulle 'n aansoek om teen die vonnis te appelleer wil bring.
Klik hier vir vorige artikels:
- 4 wat restaurant plunder weer in hof
- Opvolg: 4 plunder glo restaurant
ARTIKEL: GARNETT WICOMB, OUDTSHOORN COURANT-KORRESPONDENT
'Ons bring jou die nuutste Oudtshoorn, Klein Karoo nuus'
