OUDTSHOORN NUUS - Die Oudtshoorn-munisipaliteit gaan voort met sy herstel- en reaksiepogings ná die onlangse vloede wat groot skade aan paaie, brûe, stormwaterstelsels en ander munisipale infrastruktuur regoor die Groter Oudtshoorn-gebied aangerig het.
Volgens Candice Biscombe, munisipale woordvoerder, is die meeste skade-assesserings reeds voltooi, hoewel sommige gebiede steeds ontoeganklik is weens hoë riviervlakke.
Dit verhinder amptenare om die omvang van die skade in alle geaffekteerde gebiede volledig te bepaal.
Voorlopige kosteberamings vir die herstelwerk is reeds opgestel en ’n gesamentlike assessering met die Tuinroete-distriksmunisipaliteit en die Wes-Kaapse provinsiale regering sou op 9 Junie plaasvind om die omvang van die skade en die verwagte herstelkoste verder te evalueer.
Die munisipaliteit het bevestig dat aansoeke vir provinsiale en nasionale rampverligtingsbefondsing reeds ingedien is.
Vanoggend, 10 Junie, het die munisipaliteit ’n aanduiding gegee dat Noordstraat en Rademeyerstraat teen vanmiddag vir verkeer oopgestel sou word.
Ander rivierkruisings, Bloemstraat, Victoriastraat, Van der Rietstraat, Kerkstraat en Albertstraat, het egter ernstiger skade opgedoen en bly gesluit totdat die watervlakke voldoende gedaal het en herstelwerk voltooi kan word.
Die vloede het skade aan sekere paaie se oppervlaktes veroorsaak. Foto: Johann Coetzer
Volgens die assesserings hou geen van die paaie of brûe in die dorp tans ’n veiligheidsrisiko vir motoriste of voetgangers in nie. Die laagwaterbrûe is volgens die munisipaliteit spesifiek ontwerp om tydens periodes van hoë rivierlope oor te vloei.
Verskeie voorkomingsmaatreëls is reeds ingestel om die risiko van verdere skade te beperk indien nog reën sou voorkom. Dit sluit die inspeksie en skoonmaak van stormwaterstelsels, die verwydering van puin en slik uit waterlope, die ontplooiing van stormwater- en padspanne in vloedgevoelige gebiede, asook die plasing van waarskuwingstekens en verkeersbeheermaatreëls in.
Die munisipaliteit werk ook aan langtermynoplossings deur sy stormwater-meesterplan, wat vloedlynbepalings, hidroliese modellering en die identifisering van infrastruktuuropgraderings insluit om die dorp se stormwaterstelsel meer veerkragtig teen toekomstige oorstromings te maak.
Die munisipaliteit het beklemtoon dat die onlangse vloede die gevolg was van ’n buitengewone storm wat die kapasiteit van baie dreineringstelsels en natuurlike waterlope oorskry het.
Inwoners sal, volgens die munisipaliteit, op hoogte gehou word namate inligting beskikbaar raak.
‘Ons bring jou die nuutste Tuinroete, Hessequa, Karoo nuus’
