OUDTSHOORN NUUS - Bekende Suid-Afrikaanse sanger Mauritz Lotz, en die sanger en sjef Harry Sideropoulos span op Sondag 8 November kragte saam vir 'n spesiale fondsinsamelingsgeleentheid ten bate van die Klein-Karoo-leessentrum in Matjiesrivier net buite Oudtshoorn.
Die geleentheid vind by die Drostdy-teater in Stellenbosch plaas, waar Sideropoulos 'n driegangmiddagete voor die gehoor op die verhoog sal voorberei, terwyl Lotz met sy eie produksie, Plektrum, vir die musikale vermaak sorg.
Die middagete se spyskaart sal, waar moontlik, van bestanddele uit die Klein-Karoo gemaak word. Lotz se Plektrum is 'n intieme en persoonlike produksie waarin hy deur middel van stories, visuele elemente en musiek terugkyk na waar hy vandaan kom en die mense en ervarings wat hom gevorm het, met die klem op 'n outentieke vertelling.
Die twee kunstenaars skenk hul tyd en talent aan die geleentheid om fondse in te samel vir die Klein-Karoo-leessentrum, wat in 2015 gestig is met die doel om kinders met leesprobleme te ondersteun en hulle die vaardighede en selfvertroue te gee wat hulle nodig het om op skool te vorder.
Die sentrum, wat by Swartberg Country Manor in Matjiesrivier geleë is, het sedert sy ontstaan sy fokus uitgebrei.
Volgens Leoni Fourie, een van die stigters van die sentrum, het die projek aanvanklik gefokus op die ondersteuning van kinders met leesprobleme, maar het dit mettertyd uitgebrei tot 'n omvattende opvoedings- en ontwikkelingsprogram wat verskeie aspekte van 'n kind se ontwikkeling aanspreek.
Leerders ontvang ondersteuning om hul leesvlakke te verbeter, sterker leesvaardighede te ontwikkel en met skoolwerk by te hou. Sport en fisiese aktiwiteite vorm ook 'n belangrike deel van die program en help om selfvertroue, dissipline, spanwerk en algemene welstand te bevorder.
Die sentrum se doel is om vas te stel waar 'n kind ondersteuning nodig het en dan daardie gapings met konsekwente, praktiese hulp te oorbrug.
Hulle het ook die Tina Cowley-leessentrum gestig met toegeruste rekenaars om die kinders se leesvaardighede op te skerp.
Die sentrum se werk het terselfdertyd uitgebrei om groter sosiale behoeftes in die gemeenskap aan te spreek. Benewens opvoedkundige ondersteuning word kinders en gesinne ook met onder meer kos, klere en ander noodsaaklike ondersteuning bygestaan.
Die fondsinsamelingsmiddag in Stellenbosch bied dus nie net 'n geleentheid om twee bekende Suid-Afrikaanse kunstenaars op een verhoog te sien nie, maar om by te dra tot die voortgesette werk van 'n organisasie wat daarop gerig is om kinders in die Klein-Karoo 'n sterker grondslag vir hul toekoms te gee.
Om betrokke te raak by die leessentrum of meer inligting daaroor kan Leoni Fourie by 081 311 9211 gekontak word.
‘Ons bring jou die nuutste Tuinroete, Hessequa, Karoo nuus’
