OUDTSHOORN SAKE NUUS - Signature Divine het verlede jaar sy deure geopen en is sedertdien 'n reusesukses.
Daniëlla Fourie, die eienaar, is bekend in die spyseniering- en gasvryheidsbedryf en sê sy geniet dit om met nuwe resepte en idees vir haar restaurant vorendag te kom.
"Die gewildste op die stadium is die gourmet melkskommels, melktert-jafels en ons tapas. Ons verander die spyskaart gedurig en probeer gereeld nuwe disse en lekkernye bybring. Ons gaan ook nou met warm tapas begin en bietjie die spyskaart verander vir die winter," vertel sy.
Hulle bak hulle eie brood, maak self die souse vir die melkskommels en selfs die doppies van die tertjies word gebak as dit bestel word.
Daniëlla beplan ook iets spesiaal vir Moe-dersdag wat op 8 Mei is.
"Die spyskaart is op die stadium nog 'n verrassing, maar soos alles wat ons by Signature Divine doen beloof dit om spesiaal te wees."
Besprekings vir Moedersdag is noodsaaklik en is R155 per persoon.
Signature Divine is egter nie net 'n restaurant nie, dit is ook 'n venue vir partytjies, funksies en troues.
"Ons ligging maak Signature Divine die perfekte venue. Die berge en die natuur wat konstant saam met seisoene verander gee dit 'n heerlike, rustige atmosfeer en veral by troues sorg dit vir die mooiste foto's."
Annie's Art, Annemarie Janse van Rensburg se kunsgalery, is ook sedert April by Signature Divine.
Annemarie is 'n kontemporêre kunstenaar en werk met akriel op beide doek en bord.
"Annemarie verkoop haar eie kuns in die galery. Haar werk is uniek en gaste kan gerus deur die galery stap om haar werke te aanskou terwyl hulle wag vir hul etes."
'Ons bring jou die nuutste Oudtshoorn, Klein-Karoo nuus'
