Sponsored Content
SAKENUUS - Wanneer ’n eiendom in Suid-Afrika gekoop word, beloop die koste meer as net die koopprys.
Benewens die bedrag waarvoor die eiendom verkoop word, is daar ook verskeie oordragskoste wat betaal moet word voordat dit amptelik op die nuwe eienaar se naam geregistreer kan word.
Wat is oordragkoste?
Oordragskoste is die uitgawes wat saam met die wettige oordrag van ’n eiendom van verkoper na koper gaan en vang dikwels voornemende huiseienaars onkant.
Hereregte
Hereregte is belasting wat aan die Suid-Afrikaanse Inkomstediens (SAID) betaal moet word wanneer ’n eiendom gekoop word. Eiendomme onder R1,2 miljoen is vrygestel hiervan, maar vir eiendomme bo dié bedrag styg die belasting volgens ’n vasgestelde skaal. In sekere gevalle kan BTW in plaas van hereregte betaalbaar wees, afhangend van die aard van die transaksie.
Prokureursfooie
Oordragsprokureurs hef fooie vir die registrasie van die eiendom in die koper se naam. Indien die aankoop deur middel van ’n verband geskied, is daar ook fooie betaalbaar aan die verbandregistrasieprokureur. Hierdie fooie word bereken volgens die waarde van die eiendom en is vasgestel deur ’n voorgeskrewe skaal.
Aktekantoorfooie
Hierdie fooie word aan die Aktekantoor betaal om die oordrag amptelik te registreer.
Ander verwante kostes
Bykomende uitgawes kan administratiewe fooie, munisipale uitklaringsyfers en die koste vir die verkryging van nakomingsertifikate insluit.
Wie dra die koste?
Oor die algemeen is dit die koper wat verantwoordelik is vir hereregte, prokureursfooie en aktekantoorfooie en hierdie betalings moet gewoonlik kort ná die ondertekening van die koopkontrak gemaak word. Die verkoper bly intussen aanspreeklik vir sekere uitgawes soos munisipale uitklaringsyfers en nakomingsertifikate.
Begroot reg
Kenners beklemtoon dat voornemende kopers en verkopers deeglik moet begroot vir al die uitgawes wat met die oordrag van ’n eiendom gepaardgaan.
Die uiteengesette kostes is slegs ’n eenvoudige oorsig en kan van transaksie tot transaksie verskil. Dit is dus raadsaam om vooraf met ’n eiendomsagent of prokureur te gesels om presies te weet watter kostes op jou wag.
‘Ons bring jou die nuutste Tuinroete, Hessequa, Karoo nuus’
