Madiba Afrikaans vir 'n dag

Madiba is in 2001 gevra om die vryheid van die dorp wat deur die stadsraad aan die KKNK gegee is, te kom oorhandig. Meer as 1 500 mense het sy toespraak op die sportstadion bygewoon, wat hy afgesluit het met die wense dat dit goed sal gaan met Afrikaans en sy sprekers en verskonend bygevoeg, “Ek hoop nie dat ek hierdie Afrikaanse fees te veel bederf het met my tokkelos-Afrikaans nie.”

Die boer, die tjop en die braaier

Een van Jans Rautenbach se onthou-oomblikke van die millennium-fees was ‘n reuseboer van Bethlehem wat met een gebraaide tjop en een kaalgeknaagde tjopbeen by die sogenaamde bruinskool se braaivleisstalletjie aangedring het op die identietit van die braaier. Na ‘n lang gesukkel word die twee bewende tjopbraaiers aan hom uitgewys. “Wie van julle twee mannetjies het hierdie tjop gebraai?” Toe hy sien nie een van hulle gaan na vore kom nie, sê hy: “Laat ek julle net sê, dis die lekkerste f.... tjop wat ek nog ooit geëet het.”

Evita kry Vryheid van die Dorp

Tannie Evita Bezuidenhout het op 10 April Vryheid van die Dorp in Oudtshoorn met 'n luide applous van aanhangers by die Queens Hotel in Baron van Reedestraat ontvang. Die burgemeester, Colan Sylvester, het op die balkon van die Hotel haar sertifikaat aan haar oorhandig. Evita het haar aanhangers van die balkon af gegroet en gesê: "Dit is voorwaar 'n eer om die Vryheid van die pragtige dorp te ontvang. Nou het ek iets wat Zuma nooit sal hê nie - die vryheid tot u dorp."

40 dae se reën in 30 minute 

Op die tweede dag van die fees in 2016 het byna 40 mm reën in slegs 30 minute geval. Feesgangers wat op sypaadjies gestap het was omring deur riviere wat in strate afgestroom het en die voetbrug tussen die rivierbuurt en die dorp was onder water. Motors het hulself skielik in enjindiep water bevind en Baron van Reedestraat het tot stilstand gekom. Na die aanvanklike chaos en vere reg- en droogskud, het die fees weer aangegaan.

Die dag toe volstruise kon vlieg

Een van die hoogtepunte van die KKNK in 2012 was die straatoptog met reusepoppe en vlieënde volstruise wat feesgangers in Baron van Reedestraat na kameras laat gryp het. Die volstruise het na die optog hulle dors by die munisipale spuitfontein gaan les.

Krit laat feesgangers skrik op gekkedag

Die feeskoerant Krit raak in 1996 deel van die KKNK en dink jaarliks gekkighede op 1 April uit, o.a. dat Malvolstruissiekte in Oudtshoorn uitgebreek het, die KKNK sou na George skuif, Dowwe Dolla verwag Robbie Wessels se baba, Julius Malema gaan op die grootverhoog optree en daar heers in groot kommer oor die ongehude moeders landwyd wat presies nege maande na die KKNK geboorte skenk. Dié probleem noop Krit om op 1 April 2000 gratis kondome saam met die koerant te versprei.

'n President in die strate van Oudtshoorn

Met president Thabo Mbeki se besoek aan die tiende KKNK was die fees amptelik die enigste fees wat deur twee staatshoofde besoek is. Mbeki het die fees geopen en ‘n sekerheidsnagmerrie ontketen toe hy die strate invaar. Hy het van die verhoog af gestap en tot groot verwarring en geskarrel, in die rigting van die museum begin stap. Op ‘n verbyloper se vraag, “Thabo Mbeki, wat maak jy hier?” antwoord hy, “Wel, dis ‘n kunstefees en ek het kom sing.”

Perde-poppe word living things