OUDTSHOORN NUUS - Athol Fugard, John Kani en Winston Ntshona se bekroonde drama Sizwe Banzi is Dead, bring ’n meesterstuk na gehore by die Klein Karoo Nasionale Kunstefees (KKNK). Die KKNK word van 24 tot 30 Maart vir die 22ste keer op Oudtshoorn aangebied.
“Dit is ’n absolute voorreg om dié produksie vir KKNK-gehore na Oudtshoorn te bring. Dit is klassieke en eg Suid-Afrikaanse-teater, wat ons geskiedenis vasvang en vashou. Nadat ek dit verlede jaar by die Baxter-teater in Kaapstad gesien het, was daar geen twyfel dat almal hierdie produksie moet sien nie,” sê Hugo Theart, kreatiewe hoof van Kunste Onbeperk, die aanbieder van die KKNK.
“Dit is ’n produksie met hart en die akteurs se spel is briljant en betowerend. Die drama handel oor ’n donker deel van Suid-Afrika se geskiedenis, maar die donkerte en pyn word met soveel patos, ironie en humor oorgedra dat die tragedie bykans in hoop omskep word.”
“Dit is vir ons ’n eer om teaterlegendes soos John Kani en Mannie Manim met die produksie by die fees te verwelkom. Daar is ook verskeie geleenthede vir feesgangers om hulle, tydens gesprekke wat gratis aangebied word, te ontmoet,” vertel Theart.
John Kani se seun Atandwa Kani, vertolk saam met Mncedisi Shabangu die rolle in hierdie reis van ontdekking en lewer kommentaar oor die skeidings tussen rasse wat nog altyd in Suid-Afrika teenwoordig was, met tong-in-die-kies aanmerkings en situasies. Dit verken vryheid en identiteit deur ’n eg Suid-Afrikaanse geur aan die ontdekkingsreis te gee en beweeg gereeld tussen erns en humor.
Atandwa Kani maak dié rol, wat sy pa John Kani vier dekades gelede beklee het, sy eie met ’n nuwe relevante gees. Shabangu se uitstekende vertolkings bring die humor in die stuk sterk na vore.
Volgens John Kani het Sizwe Banzi is Dead ’n geartikuleerde standpunt van swart mense se verset teen onbillike wetgewing geword. “Dit is oor die universele stryd vir identiteit, waardigheid van menswees en respek vir menslikheid.”
“Ek, Winston en Athol was soos dr. Frankenstein wat ’n monster geskep het wat ons lewens vir meer as vier dekades vasgehou het. Ek was verheug toe die Syracuse- en Princeton Teaters in Amerika my gevra het om die produksie te laat herleef. Dit het aan my die geleentheid gebied om met jonger Suid-Afrikaanse akteurs te werk wat nog nie gebore was toe die drama vir die eerste keer op die planke was nie,” sê John Kani. Voor die seisoen in Amerika, het die nuwe produksie eers by die Markteater in Johannesburg gespeel.
Daar is slegs drie vertonings van Sizwe Banzi is Dead by die KKNK te sien, van 24 tot 26 Maart om 14:00. Verder gesels Theart op 25 Maart om 15:45 met Mannie Manim, John Kani en die akteurs oor die produksie na afloop van die vertoning en Hannes van Wyk gesels op 24 Maart om 08:30 met John Kani en Sandra Prinsloo. Hierdie twee Suid-Afrikaanse teater-ikone gesels oor hul loopbane en die gesprek dien ook as terugblik op die 1985-vertoning van Miss Julie deur August Strindberg, waar ’n soen tussen dié twee akteurs daartoe gelei het dat die gehoor uit die teater gestap het.
Belangrike feite oor Sizwe Banzi is Dead:
• Die oorspronklike toneelstuk se première was in 1972 in die Space Teater in Kaapstad. Daarna is dit met groot sukses in London en New York opgevoer.
• In 1974 ontvang die toneelstuk die London Theatre Critics-toekenning vir Beste Toneelstuk.
• In 1974 word die toneelstuk vir verskeie Tony-toekennings, die “Oscars vir teater” in Amerika, benoem: Beste Toneelstuk, Beste Regie en Beste Akteur (vir beide John Kani en Ntshona). John Kani en Ntshona wen ook díe toekenning vir beste akteur.
• Die toneelstuk het dieselfde benoemings ontvang vir die gerekende Drama Desk Awards in New York.
• Die produksie het verlede jaar groot opslae in Amerika en in plaaslike teaters soos die Markteater en die Baxter-teater gemaak.
• Die New York Times het die nuwe produksie “A joyous hymn to human nature” genoem en die New York Post beskryf dit as “Hypnotic… Overwhelming compassion… Powerful”. Volgens On Stage: “Kani and Shabangu give a riveting performance worthy of the material. This is a must-see production.”
• Atandwa Kani is genomineer vir ’n 2016 Fleur du Cap-toekenning as Beste Akteur vir sy vertolking in die produksie. Die Fleur du Cap-toekennings vind plaas op 20 Maart 2016.
• Mannie Manim – een van die vaders van die Markteater – is die vervaardiger en beligtingsontwerper van die produksie en hy is sedert 1972 by die produksie betrokke.
Die volledige feesprogram is beskikbaar by www.kknk.co.za. Kaartjies is te koop by Computicket, Shoprite / Checkers en House & Home.
Verblyfbesprekings kan aanlyn gedoen word.
'Ons bring jou die nuutste Oudtshoorn, Klein Karoo nuus'
