OUDTSHOORN NUUSFLITS - ‘n Man van Oudtshoorn wat daarvan aangekla word dat hy ‘n gesteelde fiets in George verkoop het, is Saterdag in hegtenis geneem nadat Facebook ingespan is om twee gesteelde fietse terug te kry.
James Kraus het vandag in die Oudtshoorn-landdroshof verskyn op ‘n klag van diefstal en is op R500 borg vrygelaat.
Twee fietse ter waarde van R45 000 is verlede week by die huis van Xaviera en Jaco von Molendorff gesteel. Nadat ‘n beskrywing van die fietse op Facebook geplaas is, het ‘n fietstyer van George laat weet dat hy een van die fietse gekoop het nadat dit op die internet geadverteer was.
Hy het die persoon wat die fiets aan hom verkoop het geïdentifiseer en die Von Molendorffs het die verdagte Saterdag tydens ‘n sportdag opgemerk en die polisie in kennis gestel. Kraus is by die sportdag in hegtenis geneem.
Die fiets van R30 000 is aan die eienaar terugbesorg, maar die ander gesteelde fiets is nog soek.
Meer inligting volg soos dit bekend word.
'Ons bring jou die nuutste Oudtshoorn, Klein-Karoo nuus'
