OUDTSHOORN NUUS - Talle Oudtshoorniete was deel van die Suid-Kaap se meesters-hengelspan wat deelgeneem het aan die nasionale provinsiale hengelkampioenskappe by Bloemhofdam.
Die kampioenskap het oor drie uitdagende dae gestrek, waartydens hengelspanne beproef is met sterk winde en deurdringende reën. Hengelaars het bibberend van koue en nattigheid probeer tred hou met ander hengelaars, terwyl die vis aan die byt was.
Die Suid-Kapenaars het `n moeilike eerste dag beleef en kon slegs 44 punte insamel, maar het hulle reggeruk om op die daaropvolgende dae onderskeidelik 93 en 94 punte in te samel. Die span het in die agste plek geëindig met Limpopo (323 punte) die wenners, Noord-Oos Mpumalanga (314) tweede en Noord-Kaap (310) in die derde posisie. Hengelaars van die Suid-Kaap soos Koos Nel, Johan Share, Tony Jardine en Ohná Zaayman het goeie sonepunte behaal en is genooi na die daaropvolgende nasionale proewe.
Koos Nel kon met sy goeie sone posisies 47 punte behaal uit 'n moontlike 60. Die span het 278 visse ingeweeg met 'n gewig van 274,9 kg. Grieta Nel het ook die grootste moddervis vir die kampioenskap gevang en is daarvoor beloon met 'n goue medalje.
Afrigter, Jannie Crafford, was na afloop van die kompetisies vol lof vir sy span se deursettingsvermoë en verwag dat die span eersdaags met die topspanne sal kan meeding.
Eden-hengelklub: Koos en Grieta Nel en Tony Jardine
Kango-hengelklub: Renier de Wit, Ohná Zaayman en Piet en Heida Botha
Labeo-hengelklub: Johan Share
Hartebeeskuil-hengelklub: DC Lourens (Reserwe)
DKD Oudtshoorn-hengelklub: Ben Crafford (bestuurder) en Jannie Crafford (afrigter).
Koos Nel wys hoe `n man voorberei vir die groot vangs.
'Ons bring jou die nuutste Oudtshoorn, Klein-Karoo nuus'
