OUDTSHOORN NUUS - Een van die land se voorste skolerugbykompetisies word vanjaar in die Volstruisdorp aangebied.
Wedstryde in die o.16 Coca-Cola Grant Khomo-rugbyweek word vanjaar van 6 tot 9 Julie op die Bridgton-sportterrein gespeel.
Die kompetisie is een van die land se mees belangrike jeug rugbyweke, naas die o.18 Coca-Cola Cravenweek.
Wiele is reeds aan die rol met afvaardigings van die Suid-Afrikaanse Rugbyunie, SWD-rugby en die plaaslike reëlingskomitee wat die week by die Pinehurst-koshuis van Hoërskool Oudtshoorn vergader het.
Gerrit Rudolph, voorsitter van SWD Hoërskole Rugby en voorsitter van die plaaslike reëlingskomitee was die week ook vol vertroue dat die dorp een van die beste toernooie tot nog toe sal aanbied.
Die koshuise van plaaslike hoërskole sal verblyf verskaf aan die sowat 560 spelers, afrigters en spanbestuurders vir die duur van die toernooi. `n Groot getal besoekers, insluitende ouers en ondersteuners kan ook vir die duur van die toernooi in die dorp verwag word.
Die Bridgton-sportterrein bied die ideale fasiliteit vir `n rugbytoernooi van hierdie omvang.
Die kleedkamergeriewe kan met die bestes in die land vergelyk word en die pawiljoen is toeskouer-vriendelik met `n uitsig oor drie rugbyvelde.
Die plaaslike reëlingskomitee, onder voorsitterskap van Rudolph, bestaan uit Hennie Baartman (president, SWD Arende), Johan Prinsloo (HUB, SWD Arende), Ida Schmitt, Veda Manie, Werner Rall, Jacques Swart, Dave van der Walt, Roan Olivier (Saru), Johan van der Westhuizen, Wouter Verster, Gysie Strydom, Martin de Vos, Kalbas Nell en Manie Olivier.
Coca-Cola o.13 Cravenweek: 29 Junie tot 3 Julie, Mpumalanga Rugby Unie, Hoërskool Rob Ferreira, Wit-
rivier.
Coca-Cola o.16 Grant Khomo-week: 6 Julie tot 9 Julie, SWD Rugby-unie, Bridgton-sportterrein, Oudtshoorn.
Coca Cola o.18 Akademieweek: 6 Julie tot 10 Julie, Valke Rugbyunie, Isak Steyl-stadion, Vanderbijlpark.
Coca-Cola o.18 Cravenweek: 13 tot 18 Julie, WP Rugbyunie, Paul Roos Gimnasium, Stellenbosch.
LSEN-week: 29 Junie tot 2 Julie, Boland Rugby Unie, HTS Drostdy, Worcester.
ARTIKEL EN FOTO: JACQUES SWART, OUDTSHOORN COURANT JOERNALIS.
'Ons bring jou die nuutste Oudtshoorn, Klein-Karoo nuus'
