OUDTSHOORN NUUS - Die feesvure na Bridgton se 34-20 oorwinning oor Maori's twee weke gelede, het nie lank gebrand. Hulle het Saterdag teen die Premierligakampioene, Progress, hul rieme styf geloop en met 32-21 verloor.
Die wedstryd het in George op die Rosemoor-sportterrein plaasgevind. Bridgton hoef egter nie moed te verloor nie, want met slegs drie wedstryde agter die rug in die 2018-seisoen, het hulle Progress met voor- én agterspel op hul tone gehou.
Met skitterspel in die eerste helfte het Bridgton rustyd 15-10 voorgeloop. Chessy September (haker), Enver Venter (heelagter) en Charlie Ewerts (linkervleuel) het Oudtshoorn se hoop in die eerste helfte hoog gehou, toe hulle elk 'n drie gedruk het.
Progress het hard in die kleedkamers gepraat en soos wenners van ouds gespeel.
Brianton Booysen (haker), Christo du Plessis (agtsteman) en Solomon Manxodidi (flank) het voorlangs vir Progress kragspel gelewer.
In die middelveld het hul senterpaar, Werner Jacobs (kaptein) en Cheslin Jafta, in die aanval en verdediging geskitter.
Carlton-Dee Coeries (regtervleuel), seun van die oud-Blitsbok, Darryl Coeries, het met sy spoed en voorgevoel vir die spel beïndruk. Coeries het in die 27ste minuut van die wedstryd 'n pragdrie gedruk.
Oswill Nortje (skrumskakel), Manxododidi, André Bernardo (slot) en Booysen is ook oor vir drieë vir die wenspan. Ronaldo Fortuin (heelagter) slaag met twee doelskoppe en Jade Roelfse (losskakel) met 'n strafdoel.
Bridgton se voorspelers het nooit gaan lê nie en met kragspel gedryf. Foto: Hugo Redelinghuys
Ander uitslae
- Progress II (22): Drieë - Chumani Kema (flank, 2), Josua Mabaso (heelagter), Merlin Geswindt (binnesenter). Gladwell Jafta (losskakel) klits 'n doelskop oor.
- Bridgton II (12): Drieë - Cherdeon Fielies (heelagter), Cobus Coetzee (haker). Gino van Vuuren (skrumskakel) slaag met 'n doelskop.
- Progress III (13): Drie - Yullbremmer Keffers (regtervleuel. Jaydon Fredericks (skrumskakel) slaag met 'n doelskop en 'n strafdoel.
- Bridgton III (10): Drie - David Goliaths (slot). Sydney Lucas (losskakel) slaag met 'n doelskop en 'n strafdoel.
'Ons bring jou die nuutste Oudtshoorn, Klein Karoo nuus'
