OUDTSHOORN RUGBY NUUS - Bridgton het op Saterdag 12 Mei met 27-35 teen Silver Stars op die George Rosemoor-sportterrein verloor.
Beide spanne het vyf drieë gaan druk. Dit was egter Bridgton se skopwerk wat hulle in die steek gelaat het. Bridgton se nederlaag teen Silver Stars volg 'n week na Bridgton die gedugte Evergreens met 27-25 geklop het. Die kop-aan-kop tellings en die feit dat daar nog 10 wedstryde oor is voor die uitspeelrondes, wys in die Premierliga van SWD-rugby wag nog groot opwinding.
Dit was die wenspan se vierde oorwinning agtereenvolgens en hul skuif nou op na die sesde posisie op die punteleer met 22 punte.
Stars se beste speler was ongetwyfeld hul agtsteman, Heinrich Leukes. Hy is goed bygestaan deur Enrico Ruiters (flank), Jerovin Spandiel (slot) en Franklin James (vaskopstut).
Agterlangs was Neillin Scott (heelagter), Earl Rouls (regtervleuel), die senters Ashwin Scott, Wensley Scott, Henrico Scott (losskakel) en Dillon Kerspuy (skrumskakel) baie gevaarlik met die bal in die hand.
Earl Rouls, Ashwin Scott, Henrico Scott, Dillon Kerspuy en Godwin Mangenje het die wenspan se drieë gedruk. Neillin Scott het met drie doelskoppe en 'n strafdoel geslaag. Henrico Scott het 'n strafdoel oorgeskop.
Anver Venter (heelagter), Carlos Jacobs (vaskopstut) en Bradwin Wanies (regtervleuel, drie) het vir Bridgton gaan druk. Keanin Esau (losskakel) het met 'n doelskop geslaag.
Tweede en derde spanne:
Bridgton II (31): Drieë - Duzill Avontuur (regtervleuel), Llyle Metembo (buitesenter), Johnny Baardman (losskakel), André Fielies (agtsteman), Romano Ewerts (slot). Gino van Vuuren (skrumskakel) slaag met twee doelskoppe en Levano Nathan (plaasvervanger-skrumskakel) klits ook 'n doelskop oor.
Silver Stars II (17): Drie - Johannes Jacobs (linkervleuel). Grant Scott (heelagter) slaag met vier strafdoele.
Bridgton III (12): Drieë - Ivano Malgas (heelagter), Roswin van Hansen (haker). Jacques Julies (losskakel) klits 'n doelskop oor.
Silver Stars III (10): Drie - Ruaan Cornelius (agtsteman). Sammy Jacobs (losskakel) slaag met 'n doelskop en 'n strafdoel.
'Ons bring jou die nuutste Oudtshoorn, Klein Karoo nuus'
