OUDTSHOORN NUUS - Die wêrelbekende internasionale fietsryer, Catherine Williamson, was gister (Donderdag, 21 Januarie) saam met haar man, Rob, in Oudtshoorn opgemerk.
Catherine is die huidige bergfietskampioen van die Verenigde Koninkryk. Sy het al aan verskeie wedrenne in Suid-Afrika deelgeneem en het saam met haar spanmaat, Esther Suss verlede jaar se Cape Pioneer Trek wedren in die vroue afdeling gewen.
Sy en haar man het in Beans About Coffee in Hoogstraat gekuier na 'n oefensessie in die omgewing van Vergelegen.
Mike Lombard, die voorsitter van die Oudtshoorn-fietsryklub en Jaco van Molendorf, tesourier van die klub, het met die egpaar gesels oor hulle besoek aan die omgewing. .
Volgens Williamson is sy tans hier om voor te berei vir die Cape Epic bergfietstoer later vanjaar. Dit is algemeen vir ryers van die noordelike halfrond om gedurende hulle winter hier in Suid-Afrika te kom oefen.
Wiiliamson is ook 'n bedrewe padfietsryer en het al aan verskeie padfietswedrenne in Europa deelgeneem en 'n hele aantal gewen.
Sy en haar man sê hulle is baie beïndruk met mense van Oudtshoorn se gasvryheid en het aangedui dat hulle beslis weer sal terugkeer. Volgens Mike Lombard is dit 'n groot pluimpie vir Oudtshoorn as fietsryers van Williamson se formaat spesiaal hierheen kom om te oefen.
Hy het gesê inwoners besef dalk nog nie watter ongelooflike groot rol fietsry in die ekonomie van die dorp speel nie.
'Ons bring jou die nuutste Oudtshoorn, Klein Karoo nuus'
