OUDTSHOORN NUUS - Die stem van Goliath Munro (57) het op 1 Januarie stil geword nadat hy sy stryd teen kanker verloor het, maar die bakens wat hy agterlaat in sy strewe om gelyke geleenthede vir almal te skep, veral op die gebied van onderwys en sport, sal in die toekoms nog in waarde toeneem.
Daar kan onteenseglik van Goliath gesê word dat hy in sy lewe waarde tot sy medemens se lewe toegevoeg het - as skoolhoof, maar ook as sportadministrateur.
As skoolhoof van St Mary's Primêr het hy die skool oor die jare as 'n modelskool uitgebou en baie van die oudleerders sal vandag nie alleen kan getuig van die gebalanseerde akademie, kultuur en sportopvoeding nie, maar ook van die lewenslesse waarmee hy hulle die lewe ingestuur is.
As sportadministrateur het hy veral diep spore in die sportwêreld van Eden en die Wes-Kaap getrap. Tydens die eenheidsonderhandelinge in die vroeë negentigerjare het sy leierskap en onderhandelingsvermoë tot 'n vreedsame oorgang bygedra.
Sy leiersrol het later vergestalt in, onder andere, as president van Atletiek SWD, voorsitter van SWD USSASA, voorsitter van die SWD-sportraad (nou die Eden-sportraad) en president van die Wes-Kaap provinsiale sportkonfedrasie. In 2010 is die gesogte Wes-Kaapse departement van kultuursake en sport se Legendetoekenning aan hom gemaak.
As verteenwoordiger van die WKPSK op die SASCOC-vergaderings, het sy beredeneerde bydraes altyd sport in die Wes-Kaap vooropgestel. Die goeie verhoudinge van burgerlike sportgemeenskappe met die Wes-Kaapse departement van sport kan grootliks toegeskryf word aan die verhoudinge wat hy gehelp het om daar te stel.
Sy besondere verhouding met die Wes-Kaapse LUR vir sport en die senior amptenare in die departement van kultuursake en sport het baie deure vir sport oopgemaak. Sy nugtere bydrae as lid van die nasionale Loteryraad het gehelp om stelsels in plek te plaas wat die verspreiding van fondse beter gereguleer het.
Op nasionale vlak het Goliath opgetree as spanbestuurder van die nasionale atletiekspan na die Afrika-kampioenskappe in Zimbabwe. Hy het ook by twee geleenthede die WKPSK in China verteenwoordig om bande op sportgebied te smee. Die Eden-sportraad en die sportgemeenskap bring hulde aan een van die bouers van sport in Eden en bid vertroosting toe aan sy vrou, Muriel, en sy familie.
Die gedenkdiens vind op Donderdag 7 Januarie om 19:00 in die St Paul's kerk in Conville, George, plaas en die begrafnisdiens Saterdagoggend om 09:00 vanuit die burgersentrum in Yorkstraat, George.
'Ons bring jou die nuutste Oudtshoorn, Klein Karoo nuus'
