OUDTSHOORN NUUS - 'n Span Oudtshoorn-fietsryers, Danzil Afrika, Corné en Rico Bence en Marshall Hendricks is lede van die topklub Cycle 4 Diabetes en het alle teenstanders oorheers tydens `n byeenkoms wat van 2 tot 6 Januarie in Port Elizabeth plaasgevind het.

Die span se fokus tydens die byeenkoms was om aan hul spanwerk te skaaf en getrou hieraan het Corné homself vodde getrap ter wille van die span.

Danzil het `n eerste plek behaal in die o.23 kategorie asook `n algeheel tweede plek met Marshall Hendricks die tweede junior en Rico Bence algeheel dertiende. Vier van die spanlede het ook vir John Lee, `n ryer wat aal aan die Tour de France deelgeneem het, op die algehele puntestand oorskadu.

Die ryers neem hierdie naweek aan die SWD-kampioenskappe deel wat Saterdag om 7:00 by die Volmoed-kafee wegspring. Sondag om 8:00 vind die tydtoets vanaf die Kango-grotte plaas. Heelwat ryers word verwag aangesien hierdie roetes ook tydens die SA kampioenskappe wat in April plaasvind gery sal word.


Oudtshoorn-fietsryers, Danzil Afrika, Corné en Rico Bence met Marshall Hendricks (afwesig) is lede van die topklub Cycle 4 Diabetes. Foto: Jacques Swart