OUDTSHOORN NUUS - Die derde Meiringspoort-veldwedloop wat op 28 Mei op De Rust plaasvind, sluit vanjaar ook ‘n bergfietsren in.
Albei aktiwiteite vind ook oor twee afstande plaas om gesinslede met verskillende vermoëns te akkommodeer.
Vanjaar kan deelnemers aan die gewilde Meiringspoort-veldwedloop inskryf vir die oorspronklike 19,5 km afstand, asook die korter 9,5 km. Deelnemers aan die nuwe Meiringspoort-bergfietsren kan ook inskryf vir die langer 60,5 km en korter 27,5 km roetes.
“Ons het baie versoeke ontvang van gesinne wil graag saam wil deelneem aan die dag se aktiwiteite, maar nie al die gesinslede kan of wil aan die langer en moeiliker veldwedloop deelneem nie,” sê Brende Brits, woordvoerder. “Van die gesinslede wil ook eerder fietsry as hardloop.”
Voete
Die eerste drie kilometer van die veldwedloop roete volg die teerpad tot by Barry Meijer se plaas Meijer’s Rust, vanwaar dit teen die berg uit en al langs die Grootrivier tot by Pieter Schoeman se plaas Vogelsang strek.
Die korter veldwedloop volg ‘n verskillende roete deur die dorp na Vogelsang en met ‘n sirkelroete terug na die kerk.
Die eerste deel van die twee bergfietsroetes is ook dieselfde, maar dan draai die langer roete weg oor Middelplaas na die Stompdriftdam, terwyl die korter roete gouer terugdraai dorp toe. Die langer roete word deur twee watertafels bedien.
“Geen padondersteuningsdiens word verleen nie – as jy ‘n pap wiel kry, moet jy self die lek regmaak,” sê Brits.
Noodhulppersoneel en beamptes sal die hele roete patrolleer. Roete-aanwysers sal oral aangebring word.
“Altesaam 100 inskrywings is ontvang vir die eerste Meiringspoort-veldwedloop, en verlede jaar was daar 150,” sê Brits. “Ons hoop om vanjaar 300 inskrywings te kry, asook 200 vir die bergfietsren.
“Die inisiatief van die inwoners van De Rust en omstreke is ‘n gesonde ekonomiese inspuiting vir sakeondernemings, gastehuise en eetplekke. Ons wil ook ons unieke natuurskoon met almal deel.”
Registrasie kan tussen 06:00 en 07:00 by die kerkterrein gedoen word. Laat inskrywings kan teen R50 ekstra gedoen word. Dag- en tydelike lisensies kos R35 vir nie-klublede. Onthou, slegs kontant.
Aanlyninskrywings kan ook gedoen word by www.meiringspoorttrailrun.co.za.
Alle deelnemers wat binne die afsnytyd klaarmaak ontvang ‘n medalje. Lekker prysgeld kan gewen word indien deelnemers binne die afsnytyd klaarmaak. Eerste prys vir veldwedloop 19,5 km beloop R1 000 en vir die 9,5 km R500. Prysgeld vir die bergfietsren 60,5 km is R1 000 en vir die 27,5 km R300. In die veldwedloop is daar ook pryse vir tweede tot vyfde plek, terwyl die bergfietsren pryse vir eerste, tweede en derde plek het.
Vir navrae kontak: Pieter Schoeman 082 377 0547 (Veldwedloop) en Henkie du Plessis 082 396 4049 (Bergfietsren).
'Ons bring jou die nuutste Oudtshoorn, Klein-Karoo nuus'
