SWD-krieket vereer skeidsregters

OUDTSHOORN NUUS - Die SWD-krieketskeids-regtersvereniging het verlede Saterdag hul presteerders vir die afgelope seisoen by SWD-krieket se kantore by die Oudtshoorn-sportterrein vereer.

Mario Jansen, president van die SWD-skeidsregtersvereniging, het in sy toespraak gesê dat dit verblydend is om te sien hoeveel vroulike skeidsregters hul staal wys.

Jansen het die hoop uitgespreek dat daar volgende seisoen selfs meer vroulike skeidsregters sal wees.

Kerrin Klaaste het geskiedenis gemaak toe sy die eerste vroueskeidsregter geword het wat met die Skeidsregter van die Seisoen-toekenning weggestap het.

Klaaste het in die Krieket SA Vroue Supertoernooi (Oktober 2021), die KSA Tersiêre A-toernooi in Gqeberha (in Desember 2021), die Khaya Majola Nasionale o. 19-toernooi (Potchefstroom in Desember 2021) en die CSA T20-gemeenskapsbeker in Pretoria gedurende April 2022, behartig.

Gawie Krige, Levesto le Roux en Neville du Plessis het tydens dieselfde geleentheid ere-lidmaatskaptoekennings van SWD-krieket ontvang.

Skeidsregters wat in die onderskeie Six Gun Grill-klubligaeindstryde waargeneem het, het hul sertifikate ontvang: Hulle is voor, van links: Irene Howard, Chumisa Nxangashe, Haroline Rhodes, Asisipho Mafina en Kerrin Klaaste. Agter: Nathan Rhodes, Colin Wildeman, Lorenzo Priessex en Lyndon Volkwyn.