SWD-krieket skuif na George

Video

OUDTSHOORN NUUS EN VIDEO - SWD-krieket gaan na alle waarskynlikheid van Oudtshoorn na George skuif. Benewens vir 'n paar tegniese aspekte en besonderhede oor finansiering, word aanvaar die skuif gaan plaasvind.

Dit volg nadat die George-stadsraad tydens 'n raadsvergadering op 30 Maart besluit het dat in beginsel goedkeuring verleen word dat SWD-krieket die krieketgeriewe by Rooirivierrif in George kan huur.

Ntobeko Mangqwengqwe, 'n woordvoerder van die George-stadsraad, het by navraag bevestig dat die stadsraad die besluit geneem het. Volgens hom sal die nodige openbare deelname prosesse nou plaasvind soos vereis deur wetgewing.

SWD-krieket is reeds daarvan in kennis gestel. Verdere kontak sal plaasvind oor die uitkoms van die openbare deelname proses.

Albertus Kennedy, uitvoerende hoof van SWD-krieket, het Dinsdag 18 April, aan George Herald gesê die raad van direkteure van SWD-krieket het reeds in Maart 2019 'n besluit geneem om die skuif van die hoofkwartier van SWD-krieket vanaf Oudtshoorn na George te ondersoek.

Hierdie besluit is 'n maand later deur die klubs op 'n lede vergadering sonder 'n teenstem bekragtig. Die proses het begin en rolspelers se insette is geformuleer.

Kennedy, het op 9 Desember 2019 die eerste aanbieding oor die aan-geleentheid aan die burgemeesterskomitee van die George-munisipaliteit gedoen.

'n Taakspan is daarna aangestel, maar in Maart 2020 het die Covid-19-pandemie die hele proses tot stilstand gebring. Die impak van Covid op die globale ekonomie asook die van plaaslike owerhede en sportliggame het 'n groot negatiewe impak op die projek gehad.

Volgens Kennedy het die projek in Oktober 2021 nuwe momentum gekry toe 'n afvaardiging van SWD-krieket en Krieket SA, wat die hoof- uitvoerende beampte, Pholetsi Moseki en die direkteur van krieket, Graeme Smith, ingesluit het, George-burgemeester, Leon van Wyk, ontmoet het.

Die prosesse is gevolg en op 30 Maart het die raad die besluit goedgekeur.

Kennedy het gesê die fasiliteit wat ontwikkel gaan word is by Rooirivierrif. "Ons wil 'n topklas fasiliteit in die Suid-Kaap vestig en wil planne in plek sit om in 2027 wanneer SA die Krieketwêreldbeker aanbied, opwarmingswedstryde in George te speel.

"Die Suid-Afrikaanse krieketbase is opgewonde oor die besluit. George se ekonomiese omgewing was die dryfveer agter die besluit."

Hy het benadruk dat die fasiliteit in Oudtshoorn steeds deur SWD gebruik gaan word. "Ons het dit oor die jare (sedert die vestiging van die REC-krieketstadion in 2004) opgebou. SWD-krieket het oor die jare 'n beduidende impak op die ekonomie van Oudtshoorn gehad en groot blootstelling via direkte TV-dekking aan die dorp gegee."

Brendan Adams, burgemeesterskomiteelid vir sport, het gesê George verwelkom SWD-krieket in die stad.

"Ons is besig om George in die sportmekka van Suid-Afrika te ontwikkel. George is besig om teen 'n verskriklike tempo te ontwikkel."

Hy het egter bygevoeg dat begrotings-tekorte kniehalter die groei. "Ons sit met die begroting van 'n dorp, maar ons is 'n stad."

Albertus Kennedy. Foto: Verskaf