So het oudpres. FW de Klerk Dinsdag in Kaapstad gesê op die herdenking van sy geskiedkundige toespraak in 1990 waarin die einde van apartheid aangekondig is.
De Klerk het gesê Suid-Afrika is vandag meer verdeeld as 26 jaar gelede en politieke leiers is deels verantwoordelik hiervoor.
“Rassisme is ’n te groot deel van politieke leiers se narratief,” het hy gesê. “Daar is geweldige uitbarstings van rassisme in sosiale media. Ek dink nie dit is verteenwoordigend van die oorgrote meerderheid van die bevolking nie. Ek dink die meerderheid swart, wit, bruin en Indiërmense wil hê Suid-Afrika moet slaag, wil hande vat oor die kleurgrens heen en is gematig.”
