Water steeds nie drinkbaar

DE RUST NUUS - Die waterprobleem in De Rust is steeds nie opgelos nie.

Die Oudtshoorn Courant berig sedert die begin van die jaar oor die waterkrisis wat in De Rust heers as gevolg van roet wat na swaar reën in die water beland het.

Volgens Ntobeko Mangqwengqwe, woordvoerder, van die Oudtshoorn-munisipaliteit, het hulle die week die bakteriologiese uitslag gekry van 'n watermonster wat verlede Donderdag in De Rust geneem is en is die water steeds nie geskik vir menslike gebruik nie.

"Daar is geen E.coli in die water nie. Die chemiese uitslae van die watermonster lyk egter nie so goed nie. Die ysterinhoud is tans 2,2mg/L en moet <0,2mg/L wees. Hierdie hoë ysterinhoud sal klere laat vlek en is ook 'n gesondheidsrisiko vir sensitiewe groepe. Die water is ook baie troe-bel en is dus steeds nie geskik vir menslike gebruik nie," het hy gesê.

Intussen word water steeds aan De Rust geskenk. Cango Valley Water het Maandag 1000 liter gebottelde water geskenk en dit self in Blomnek, die kliniek en die res van die dorp uitgedeel.

Ray Fewell, eienaar van Ray's Coffee op De Rust, het ook aan die Oudtshoorn Courant gesê dat verskeie mense al by hulle waterskenkings afgelewer het.

"Van die mense kom so ver soos Witbank en Groot-Brak. Ons deel die water tussen die mense uit wat dit nodig het," het hy gesê.

Mangqwengqwe het Woensdag aan die Oudts-hoorn Courant gesê dat die munisipaliteit ongeveer 1 200 bottels water stoor.

"Die water sal versprei word wanneer die waterkrisis in De Rust vererger. Tot dusver kan ons nog op 'n daaglikse basis water aan mense met die watertrokke verskaf," het hy gesê.

Klik hier vir vorige artikels: