Vyf wenke wat jou lewe kan red

OUDTSHOORN NUUS - Talle brande in en om die dorp, die afgelope paar weke, het groot verwoesting gesaai. Persoonlike eiendom en huise is verloor en boere het ook verliese gely. Mornay Thysse van Oudtshoorn-nooddienste bied die volgende advies aan enigeen wat met `n brand gekonfronteer word.

1) Bel dadelik

"Skakel die brandweer," sê Thysse. "Die noodnommer is 044 203 3147. Dit is belangrik dat geen tyd vermors word nie.

Skakel onmiddellik omdat die brand met elke minuut wat verby gaan, dalk buite beheer kan raak.

Dit is ook belangrik om te sê wat aan die brand is. Dit help die brandweerpersoneel om hulle voor te berei vir dit wat hulle op die toneel aan sal tref."

2) Smoor die vuur

Elke vuur het suurstof nodig om asem te haal. Meer suurstof beteken `n groter vuur en een wat gou buite beheer kan raak. Indien dit moontlik is, moet toegesien word dat die vuur gesmoor word.

"Maak onmiddellik alle deure en vensters toe sodat die vuur nie suurstof kan kry nie en so verhoed jy dat die vuur ook nie verder kan versprei nie."

3) Oppas vir elektrisiteit

"As dit 'n elektriese brand is, skakel onmiddellik die krag af by die hoofskakelaar," sê Thysse. `n Lewendige elektriese stroom stel almal, ook die brandweermanne wat die vuur kom blus, se le-wens in gevaar.

4) Bly veilig

Besittings kan vervang word, nie `n mens se lewe nie, sê Thysse.

"As die vuur buite beheer is, ontruim onmiddellik die huis en bly op 'n veilige afstand en moet nooit terug hardloop in `n brandende gebou nie."

5) Verwyder enige brandgevaar

Mens moet bedag wees op die moontlikheid dat brande maklik in Oudtshoorn se somershitte kan ontstaan. Deur vroegtydig op te tree kan brande voorkom word.

"Mense wat in die veld bly kan alle bosse wat kan lei tot `n vuur of die vinnige verspreiding van vuur na die huis skoon maak," sê Thysse.

NOODNOMMERS:
Brandweer: 044 203 3147
Metro ambulansdienste: 10177
SA Polisiedienste: 044 203 9022 of 203 9089
AMBU 911: 084 809 0304

MED-LIFE: 084 021 1283