OUDTSHOORN NUUS - Die nou reeds bekende sand-en-klip diefstalsaak teen die voormalige burgemeester van Oudtshoorn, Gordon April, en 'n munisipale amptenaar, Raymond Wagenaar, destyds assistentdirekteur stormwater en strate, is Vrydag in die Oudtshoorn-streekhof vir die soveelste keer uitgestel sonder dat die verhoor hervat kon word.
Streeklanddros Mark van Wyngaardt het die saak die keer op versoek van die twee beskuldigdes se nuutste regsverteenwoordiger, Gideon Badenhorst, uitgestel sodat hy die oorkondes kan bekom.
Die oorkondes is vroeër aan 'n prokureur van George oorhandig wat glo reeds 'n aansienlike bedrag deur die beskuldigdes betaal is.
Op versoek van die regsman om nog 'n betaling te maak het die twee beskuldigdes egter besluit om nie verder van sy dienste gebruik te maak nie. Die prokureur se aanstelling het gevolg nadat die Oudtshoorn-munisipaliteit in September verlede jaar onder administrasie geplaas en die hof meegedeel is dat die twee se regskoste nie voortaan deur die munisipaliteit betaal sal word nie.
Die staatsaanklaer, Tommy Verreyne, was Vrydag duidelik nie gelukkig met die toedrag van sake nie. Volgens hom het hy die nuus dat April en Wagenaar hul regsverteenwoordiger die trekpas gegee het eers Donderdag ontvang.
"Die saak word aanhoudend uitgestel en van die getuies het al gesterf. Die saak moet nou gefinaliseer word," het Verreyne gesê.
Volgens hom kon April vroeër in 'n ander saak teen hom, nie 'n prokureur bekostig nie en het versoek om vir regshulp aansoek te doen. "Dit gaan oor die betaling van 'n prokureur," het Verreyne gesê.
Badenhorst het die hof meegedeel dat hy "die saak vorentoe sal wil vat".
Die laaste staatsgetuie wat in Julie verlede jaar getuig het was die bestuurder van 'n munisipale vragmotor op Dysselsdorp, Aubrey Rala, wat getuig het hoe hy die sand en klip van 'n munisipale depot op Dysselsdorp na die woning van April geneem het.
Volgens hom het Wagenaar hom opdrag gegee om die sand en klip na April se huis te neem. Toe hy daar aankom was werkers reeds besig om 'n sementblad te gooi.
Toe daar nie meer sand en klip by die depot was nie moes hy sand in die rivier gaan haal.
April se regsverteenwoordiger daardie tyd, adv. Willie Vermeulen SC, het die hof meegedeel dat die sand en klip nodig was vir werk aan die sypaadjie voor April se huis.
Die landdros het Vrydag die saak tot Maandag 8 Februarie uitgestel om die twee beskuldigdes 'n redelike tyd te gee om met hul nuwe regsverteenwoordiger te praat".
* April en Wagenaar staan tereg op vyf aanklagte van diefstal en die onwettige gebruik van 'n munisipale voertuig terwyl April ook aangekla word van regsverydeling en intimidasie.
Klik hier vir vorige artikels:
- Sand-en-klip diefstalsaak weer uitgestel
- Administrateur steek stokkie voor regskoste
- Sand-en-klip-diefstalsaak weer uitgestel
- Nuwe prokureur in sand-en-klip-saak
- Twis oor April se regskoste draai in hof
- Munisipaliteit betaal nie verdere regskostes
- Opvolg: Oud-burgemeester in hof
- Burgemeester se sand en klip verhoor begin
- Oudtshoorn burgemeester in hof
'Ons bring jou die nuutste Oudtshoorn, Klein Karoo nuus'
