OUDTSHOORN NUUS - "Die Eden- en Sentraal Karoo-distrik het 'n 84,78% slaagsyfer vir 2016. Agt skole in dié distrik het 'n 100% slaagsyfer behaal." So sê Millicent Merton, woordvoerder van die Wes-Kaapse onderwysdepartement.
Die Oudtshoorn Courant se verslagspan het van die skole besoek ten tye van die matriekuitslae se aankondiging.
By Hoërskool Zwartberg in Prins Albert was die leerders gister (Donderdag 5 Januarie) klokslag om 12:00 by die skool vir hul matriekuitslae. Skoolhoof, Ricky McKnight was die een wat die goeie én slegte nuus moes oordra.
Die 39 matriekulante daar kon daarin slaag om 'n slaagsyfer van 69,23% te behaal. 70,36% van dié matrieks kwalifiseer vir tersiêre opleiding. Die topleerder is Cornell Bezuidenhout, met 'n gemiddelde persentasie van 75,6%. Sy hoogste vakpersentasie, 86%, is vir Wiskundige Geletterdheid.
By Aurial Kollege, Oudtshoorn het die 72 matriekulante 'n 88,7% slaagsyfer behaal. Agt van hulle het nie die mas opgekom nie en sal 'n hermerk of hereksamen moet oorweeg. Aurial Kollege se Jody-Ann Mei is dié skool se enigste A-kandidaat.
By Hoërskool Oudtshoorn spog skoolhoof Coenie de Vos met 'n 98,2% slaggsyfer. Twee van sy 2016-matrieks het gedruip, terwyl nog twee nie die eksamen voltooi het nie.
By Langenhoven Gimnasium het al 148 matrieks geslaag en 61% van hulle kwalifiseer vir graadkursusse.
Die skoolhoof, Stephanus Potgieter spog met 11 A-kandidate. Hul topleerder is Natania Truter met 91,4%. Sy het 7 A-gemiddeldes behaal.
204 van die 217 matrikulante van Bridgton Senior Sekondêr (BSS) (94%), het die 2016 matriekeksamen geslaag waarvan 63 met universiteitstoelating. 2015 se slaagpersentasie was 89,4%.
Nelgim Jacobs wat met 'n gemiddelde van 80,1 % geslaag het is die skool se enigste wat met 'n A-gemiddelde geslaag het en die skool se toppresteerder.
"Ons is baie tevrede met die uitslae omdat dit hoër is as die teiken wat ons vir onsself gestel het," sê die skoolhoof, Kelly Ellis.
Hy sê hy is baie trots op die leerders en groot dank verskuldig aan die opvoeders.
Die voorsitter van die beheerliggaam, Patrick van Vuuren, het die goeie slaagsyfer toegeskryf aan 'n toegewyde span onderwysers.
Alhoewel die slaagsyfer van die Hoërkool Fezekile 84,4% is teenoor die 91,2% van 2015, is die waarnemende skoolhoof, Thembeka Mnguni Mabongo, heel tevrede. "Dit is 'n goeie kwaliteit uitslag," sê Mabongo.
"Altesaam 17 kandidate het met universiteitstoelating geslaag en 28 wat vir 'n diploma kan gaan studeer."
Van die 66 kandidate wat die eksamen afgelê het, het 56 geslaag. Michael Titus (71,5%) en Stwayi Lifa (69,2%) is die skool se twee toppresteerders.
Môrester Hoërskool het 'n 91% slaggsyfer behaal met geen A-kandidate nie. Hul twee toppresteerders, Angelique Hermanus en Courtney Ingo spos beide met 'n 76%-slaagsyfer.
Sammy Elie, skoolhoof van Hoërskool Ladismith is trots op sy 100%-slaagsyfer. Dié skool se toppresteerder is Marcel Simpson met 'n 98%-slaagsyfer. Sy het 7 A-gemiddeldes behaal.
De Rust Sekondêr het 98%-slaagsyfer. Hulle toppresteerder is Luciano Adams het met 92% geslaag. Hy het vyf A-gemiddeldes behaal.
- Aurial Kollege: 88,7%
- Beaufort-Wes Sekondêr: 77,7%
- Bridgton Sekondêr: 94%
- Calitzdorp Hoërskool: 97.5%
- De Rust Sekondêr: 98%
- Dysselsdorp Sekondêr: 83.5%
- Fezikele Skondêr: 84.8%
- Haarlem Sekondêr: 82.8%
- Ladismith Hoërskool: 100%
- Ladismith Sekondêr: 81.9%
- Langenhoven Gimnasium: 100%
- Môrester Sekondêr: 91,1%
- Oudtshoorn Hoërskool: 98,2%
- Uniondale Hoërskool: 83%
- Zwartberg Hoërskool: 69,2%
Veertien van Hoërskool Oudtshoorn se vyftien A-kandidate. Foto: Christo Vermaak
ARTIKEL: OUDTSHOORN COURANT-VERSLAGSPAN
'Ons bring jou die nuutste Oudtshoorn, Klein Karoo nuus'
