OUDTSHOORN NUUS - Verlede Vrydagoggend se raadsvergadering is in chaos gedompel toe die speaker summier besluit het om die vergadering te beëindig.
Die raad moes Vrydagoggend vergader om die dorp se begroting en Geïntegreerde Ontwikkelingsplan goed te keur. Voorstelle is deur die DA- en ANC-koukusse ingedien waaroor eers gestem sou word. Die speaker van die raad, John Stoffels, het egter besluit dat dit nie nodig sou wees om oor die voorstelle te stem nie, aangesien die voorstelle, volgens hom, basies dieselfde was.
Die ANC hoofsweep, Eric Ngalo, het voorge-stel dat die begroting eers na werksessies terugverwys word. Die DA se Chris Macpherson het hiermee saamgestem, maar het gevra dat daar eers die oggend in die raad gestem sou word om die begroting af te keur of te aanvaar, alvorens dit na werksessies terugverwys word.
Tydens `n vurige debat tussen raadslede, het Stoffels eers die publiek opdrag gegee om die vergadering te verlaat en daarna ook gedreig om Macpherson en Wessie van der Westhuizen uit die vergadering te verwyder toe dié aan hom gevra het of hy verstaan wat sy posisie as speaker behels.
Dit was uiteindelik die Cope-raadslid, John Maxim, wat opgestaan het en aan die speaker gesê het dat hy `n reëling gemaak het om die vergadering te beëindig.
"Nou waarom beëindig u dit nie?" het Maxim gevra, waarna Stoffels `n einde aan die oggend gebring het. Verrigtinge is afgesluit toe `n raadslid die ander in gebed gelei het. Die Onse Vader is in `n koor opgesê.
Deur die vergadering te beëindig, het Stoffels verhoed dat die voorgestelde begroting moontlik deur die DA/Cope-koalisie afgekeur sou word. Macpherson het die speaker se optrede Vrydagoggend as onwettig beskryf.
Met sy optrede, het Stoffels weereens vrae laat ontstaan oor die magte van `n speaker binne raadsvergaderings. Daar word tans gewag op die appèlhof om te beslis oor regter Owen Rogers se bevinding dat Stoffels buite sy magte opgetree het toe hy 11 DA-raadslede en `n Cope-raadslid verlede jaar geskors het.
Verwante artikels:
- Speaker besluit wie ry en wie bly
- Wagenaar daar vir almal Nuwe raadslid wil gemeenskap dien
- My beker loop oor
- Onthou Wyk 7 se tussenverkiesing môre
- Wyk 7 kanidate reg vir 6 Mei
Die speaker van die Oudtshoorn raad, John Stoffels en die waarnemende munisipale be-stuurder, Ronnie Lottering, tydens Vrydagoggend se vergadering.
ARTIKEL: JACQUES SWART, OUDTSHOORN COURANT JOERNALIS.
'Ons bring jou die nuutste Oudsthoorn, Klein-Karoo nuus'
