OUDTSHOORN NUUS - “Die DA kan volgende Vrydag die raad oorneem soos wat die kiesers reeds in 2013 besluit het.”
Dit was die boodskap van raadslid Wessie van der Wersthuizen, koukusleier van die DA op Oudtshoorn.
Dit volg nadat die omstrede speaker, raadslid John Stoffels, vandag uit sy amp bedank het en raadslid Chris Macpherson van die DA as nuwe speaker verkies is.
‘n Spesiale raadsvergadering, wat vir die publiek gesluit was, is vandag belê om die begroting wat Dinsdagaand afgekeur is weer voor die raad te lê. Stoffels het egter aangekondig dat die waarnemende munisipale bestuurder, Ronnie Lottering, eers ‘n belangrike aankondiging sal maak voordat die begroting bespreek word.
Lottering het toe die speaker se bedankingsbrief voorgelees.
Die raadsvergadering, wat nie deur die 9 ANC raadslede bygewoon is nie, is vir 15 minute verdaag sodat nominasies vir die pos van speaker voorberei kon word. Macpherson was die enigste genomineerde en het die speakerstoel ingeneem.
Daar was ‘n voorstel dat die begroting nie voor die raad dien nie, maar dat die minister gevra word vir uitstel sodat die begroting hersien kan word en op 10 Julie voor die raad gelê word vir goedkeuring.
In ‘n perskonferensie deur die DA en Cope, wat ook deur die oud-speaker John Stoffels bygewoon is, is die versekering gegee dat die herstel van Oudtshoorn begin het.
Wat die herstelplan van minister Pravin Gordhan aanbetref het Van der Westhuizen gesê daar sal beslis ‘n herstelplan gevolg word, maar dat die DA se federale raad insette sal lewer.
ARTIKEL EN FOTO: HANNES VISSER, OUDTSHOORN COURANT-REDAKTEUR
'Ons bring jou die nuutste Oudtshoorn, Klein-Karoo nuus'
