OUDTSHOORN NUUS - Die Groter Oudtshoorn-munisipaliteit, in samewerking met die departement van water en sanitasie, het tussen 7 en 11 Oktober vyf skole in die Groter Oudtshoorn-distrik besoek om sessies oor waterbesparing aan te bied.
Die Oudtshoorn-munisipaliteit en die departement van water en sanitasie het verlede week suksesvol opvoedkundige sessies by skole regoor die streek aangebied, wat die kritiese belang van waterbesparing beklemtoon het.
Leerders het deelgeneem aan gesprekke oor onderwerpe soos die watersiklus, waterbronne, behandelingsprosesse, hergebruik van gryswater en praktiese maniere om water in hul daaglikse lewe te bespaar. Hierdie sessies het daarop gefokus dat die besparing van water 'n gesamentlike verantwoordelikheid is.
Op 'n latere stadium sal leerders deelneem aan uitstappies om plaaslike waterbehandelingsaanlegte te besoek en meer te leer oor afvalwaterbestuur. Dit bied praktiese ervaring sodat leerders 'n beter begrip kan hê van waar hul water vandaan kom en hoe dit verwerk word.
Aurelia Mle, woordvoerder van die Oudtshoorn-munisipaliteit, het gesê hierdie pogings het ten doel om studente te inspireer om water te bespaar.
Chris Swart, senior bestuurder van water- en sanitasiedienste, het gesê dat dit belangrik is om jongmense te leer oor die waarde van waterbesparing, sodat hulle kan verstaan hoe om vir ons planeet te sorg.
“Hulle kan hierdie kennis by die huis deel deur hul ouers en broers en susters te vertel wat hulle geleer het. Só kan almal saamwerk om water te bespaar.”
Die aanbieding en sessies by die skole het ook visuele oefeninge met die kinders ingesluit het.
Vergroeningsinisiatief
Behalwe vir die Waterbewustheidsveldtog, is die munisipaliteit ook besig met 'n Vergroening van die Groter Oudtshoorn-inisiatief, wat amptelik op 15 Oktober begin het. Dit is deel van hul verbintenis tot omgewingsbewaring. Die projek bou voort op die momentum van Boomplantmaand 2024, en word daar 'n beroep op skole, inwoners en besighede gedoen om aktief deel te neem aan die vergroening van die gemeenskap.
'n Boom word by Bergsig Primêr geplant.
Onder die tema, ‘Viering van 30 jaar van vryheid: die bevordering van omgewingsbewaring en volhoubare bosbestuur,’ sal die vergroeningsinisiatief sien dat plaaslike skole betrokke raak by die plant van inheemse bome. "Die doel is nie net om die plaaslike omgewing te verbeter nie, maar ook om bewustheid te kweek oor die belangrike rol wat bome speel in die bekamping van klimaatsverandering en die verbetering van luggehalte," verduidelik Mle.
Met die Waterbewustheidsveldtog en die Vergroeningsinisiatief volg Oudtshoorn-munisipaliteit 'n deeglike benadering tot omgewingsopvoeding en -aksie.
“Ons is verheug om te sien hoe ons jeug betrokke raak by hierdie deurslaggewende onderwerpe. Beide water en bome is die grondslag vir lewe en ons planeet se welstand. Hierdie inisiatief voed nie net op nie, maar bemagtig ons gemeenskap om merkbare stappe te neem om ons omgewing te bewaar,” het Ambrose Carelse, Oudtshoorn-munisipaliteit se omgewingsbeampte, gesê.
Inwoners word aangemoedig om by die beweging aan te sluit deur deel te neem aan boomplantgeleenthede en waterbesparingspraktyke by die huis aan te neem.
- Vir meer inligting oor komende boomplantgeleenthede, kontak Carelse by ambrose@oudtmun.gov.za of 044 203 3982.
‘Ons bring jou die nuutste Tuinroete, Hessequa, Karoo nuus’
