Man skiet seun dood, verhoor begin

OUDTSHOORN NUUS - Die verhoor van Benjamin Joubert het die week in die Oudtshoorn-streekhof begin.

Joubert verskyn op aanklag van moord nadat hy Desember verlede jaar die 19-jarige AJ (Reginald) Oliphant op sy erf doodgeskiet het.

Die saak is egter gister (Donderdag) vir verdere verhoor uitgestel omdat adv. Michelle Weyers wat vir die staat optree bykomende ballistiese verslae wil aanvra.

Christo van der Bergh, Joubert se prokureur, het sy ontevredenheid in die hof uitgespreek.

Landdros Mark van Wyngaardt het ook sy ontevredenheid hieroor uitgespreek en gesê dat die verslae reg van die begin af gekry moes gewees het.

Van der Bergh het Dinsdag, toe die saak begin, gesê sy kliënt pleit onskuldig op die aanklag van moord.

Van der Bergh het Joubert se pleitverduideliking in die hof uitgelees en gesê sy kliënt ontken dat hy Oliphant opsetlik en wederregtelik gedood het.

Volgens die pleitverduideliking het Joubert die aand van die voorval wakker geword na hy 'n geluid buite die huis gehoor het. Hy het sy vuurwapen geneem en ondersoek gaan instel.

"Ek het om die motorhuis geloop toe ek 'n figuur op my sien afstorm. Ek het 'n skoot afgevuur en die figuur het geval," lui die verduideliking.

Die wond was agter Oliphant se regter oor.

Van der Bergh het verder gesê dat Joubert ongeveer drie mense sien weghardloop het.

Adv. Michelle Weyers tree vir die staat op.

Konst. Wayde Coetzee was die staat se eerste getuie. Volgens hom was hy en ao. Martin Pepper eerste op die toneel.

"Dit was ongeveer 02:00 toe ons daar aankom. Die beskuldigde het ons by die voorste hek ingewag met die rewolwer in sy regter hand. Hy het dit aan Pepper oorhandig. Hy het ons verduidelik wat gebeur het en ons gaan wys waar die liggaam lê. Die liggaam was op die grasperk tussen die huis en die motorhuis. Die beskuldigde en sy vrou was alleen op die toneel," het hy gesê.

Van der Bergh het tydens die kruisondervraging vir hom gevra of hy bewus was van die vorige klagtes van inbraak waarop die konstabel ja geantwoord het.

Volgens Coetzee was hy en Pepper die vorige aand (9 Desember 2015) by Joubert se huis na hy oor 'n moontlike inbraak gebel het.

Pepper was die tweede getuie. Volgens hom het hy geen vorm van 'n wapen by Oliphant se liggaam gekry nie.

"Al wat daar was was 'n flitslig en 'n hoedjie. Ek neem aan die oom het gedink die oorledene gaan hom aanrand en dis waarom hy geskiet het," het Pepper getuig.

"Die oorledene het redelik naby gelê vanwaar die oom geskiet het. Sy voete het na die oom toe gelê."

Pepper sê dat daar items op die erf was wat moontlik gesteel kon word. Volgens hom het Joubert aan hom gesê dat die items, 'n koevoet, rooster en tuinslang, geskuif was van waar hulle oorspronklik gestaan het.

Hy het ook erken dat hy die vorige aand Joubert se huis besoek het na hulle die oproep van 'n moontlike inbraak gekry het.

Die derde getuie was 'n minderjarige seun. Hy het in camera getuig.

Van der Bergh het na die verrigtinge aan die Oudtshoorn Courant gesê dat die hof die seun se getuienis as leuenagtig afgemaak het en dat hy in gevolge Artikel 204 moontlik aangekla kan word. Volgens die artikel kan getuies vrygespreek word van misdade waaroor hulle getuig sou hulle getuienis eerlik wees.

Die hof het Dinsdag 'n ter plaatse ondersoek aan die huis gedoen. Daar is aan die landdros, Mark van Wyngaardt, uitgewys waar die liggaam gelê het en presies hoe die aand tot en met die skietery verloop het.

Klik hier vir vorige artikels: